शनिवार, 24 अक्तूबर 2015

चलव जयंती मनाबो

चलव जयंती मनाबो, गुरू घासी दास के
गुरू घासी दास के संगी गुरू घासी दास के

घर कुरिया लिप पोत के, खोर अंगना सजाबो
जैतखाम मा सादा झंड़ा, फेरे नवा चढाबो
अउ चैका हम कराबो, गुरू घासी दास के
गुरू घासी दास के संगी गुरू घासी दास के


सादा सादा ओढ़ना पहिरे, सादगी ला बगराबो
छांझ मांदर हाथ धरे, गुरू के जस ला गाबो
अउ पंथी नाच देखाबो, गुरू घासी दास के
गुरू घासी दास के संगी गुरू घासी दास के

गुरू संदेशा मन मा धरे, सत के अलख जगाबो
सत के रद्दा रद्दा रेंग रेंग, सतलोक मा जाबो
सतनाम धजा फहराबो, गुरू घासी दास के
गुरू घासी दास के ओ संगी गुरू घासी दास के