गुरुवार, 1 अक्तूबर 2015

लाल बहादुर लाल हे


लाल बहादुर लाल हे, हमर देष के शान ।
सीधा-सादा सादगी, जेखर हे पहिचान ।।

सैनिक मन के हौसला, जेन बढ़ाये घात ।
भुईया के भगवान के, करे पोठ जे बात ।।
दे नारा जय जवान अउ, जय हो हमर किसान । लाल बहादुर लाल हे....

निर्धनता ला जेन हा, माने ना अभिशाप ।
मुखिया होके देश के, छोड़े अपने छाप ।।
राज धरम के जेन हा, करे खूब सम्मान । लाल बहादुर लाल हे....

खास आम सब ले कहे, मात्र एक संदेश ।
करव कर्तव्य सब अपन, आवय सबके देश ।।
तुहर भरोसा देश हे, जेखर तुहीं मितान । लाल बहादुर लाल हे...