रमेश चौहान के छत्‍तीसगढ़ी कविता

डोहारत-डोहारत, घर भर बर पानी मोरे कनिहा-कुबर, दाई टूटत हवे । खावब-पीयब अउ, रांधब-गढ़ब संग बाहिर-बट्टा होय ले, प्राण छूटत हवे ।। डोकरा-डोकरी संग, लइका मन घलोक घर म नहाबो कहि कहि पदोवत हे। कइसे कहंव दाई, नाम सफाई के धरे शौचालय बैरी हा, दुखवा बोवत हे ।।

जात-पात भाषा-बोली, अउ मजहबी गोठ राजनीति के चारा ले, पोठ होगे देश मा । टोटा-टोटा बांधे पट्टा, जस कुकुर पोसवा देश भर बगरे हे, आनी-बानी बेश मा । कोनो अगड़ी-पिछड़ी, कोनो हिन्दू-मुस्लिम कोनो-कोनो दलित हे, ये बंदर बाट मा । सब छावत हवय, बस अपने कुरिया देश भले बोहावय, धारे-धार बाट मा ।।

ये सरकारी चाउर, सरकारी शौचालय त परे-परे बनगे,  कोड़िया-अलाल के । जेला देखव कंगला, अपने ल बतावय गोठ उन्खर लगय, हमला कमाल के ।। फोकट म पाय बर, ओ ठेकवा देखावय । कसेली के दूध घीव, हउला म डार के । मन भर छेके हवे, गांव के गली परिया सड़क म बसे हवय, महल उजार के ।।

लइका दाई के दूध पिये, दाई-दाई चिल्लाथे । आया डब्बा के दूध पिये, अपने दाई बिसराथे।। जेने दाई अपने लइका, गोरस ला नई पियाये। घेरी-घेरी लालत ओला, जेने ये मान गिराये ।। सभ्य बने के चक्कर मा जे, अपन करेजा बिसराये । बोलव दुनिया वाले कइसे, ओही हा सम्य कहाये ।। दाई के गोरस कस होथे, देश राज के भाखा । पर के भाखा ओदर जाही, जइसे के छबना पाखा ।। म्याऊ-म्याऊ बोल-बोल के,  बिलई बनय नही तोता। छेरी पठरू संग रही के, बघवा होय नही थोथा ।। अपने गोरस अपने भाखा, अपने लइका ला दे दौ । देखा-सेखी छोड़-छाड़ के, संस्कारी बीजा बो दौ ।

करिया-करिया घटा, बड़ इतरावत बड़ मेछरावत, करत हवे ठठ्ठा । लुहुर-तुहुर कर, ठगनी कस ठगत बइठारत हवे, हमरे तो भठ्ठा ।। नदिया-तरिया कुँआ, घर के बोर बोरिंग पियासे ठाड़े जोहय, रद्दा एको बूंद के । कोन डहर बरसे, कोन डहर सोर हे बैरी हमरे गांव ला, छोड़े हवे कूंद के ।।

कहाँ ले पाथे आतंकी, बैरी नकसली मन पेट भर भात अउ, हथियार हाथ मा । येमन तो मोहरा ये, असली बैरी होही हे जेन ह पइसा देके, खड़े हवे साथ मा ।। कोन धनवान अउ, कोन विदवान हवे पोषत हे जेन बैरी, अपनेच देश के । खोज खोज के मारव, मुँहलुकना मन ला येही असली बैरी हे, हमरेच देश के ।।

हमर धरम तो बस एक हे । देश-भक्ति हा बड़ नेक हे जनम-भूमि जन्नत ले बड़े । जेखर बर बलिदानी खड़े मरना ले जीना हे बड़े । जीये बर जीवन हे पड़े छोड़ गोठ तैं अधिकार के । अपन करम कर तैं झार के अपने हिस्सा के काम ला । अपने हिस्सा के दाम ला करना हे अपने हाथ ले । भरना हे अपने हाथ ले बइमानी भ्रष्टाचार के। झूठ-मूठ के व्यवहार के जात-पात के सब ढाल ला । तोड़व ये अरझे जाल ला देश बड़े हे के प्रांत हो । सोचव संगी थोकिन शांत हो देश गढ़े बर सब हाथ दौ । आघू रेंगे बर सब साथ दौ मनखे-मनखे एके मान के । सबला तैं अपने जान के मया-प्रेम मा तैं बांध ले । ओखर पीरा अपने खांध ले  देश मोर हे ये मान ले । जीवन येखर बर ठान ले अपने माने मा तो तोर हे । नही त तोरे मन मा चोर हे