रमेश चौहान के छत्‍तीसगढ़ी कविता

चाल बदल गे ढाल बदल गे, जब ले आए कोरोना । काम बंद हे दाम बंद हे, परगे हे  हमला रोना ।। काम-बुता के लाले परगे, कइसे अब होय गुजारा । कतका  हम डर्रावत रहिबो, परय न पेट म जब चारा । रोग बड़े हे के पेट बड़े, संसो  हे गा बड़ भारी ।  कोरोनो-कोरोना चिहरत, कभू मिटय न अंधियारी ।। घर मा घुसरे-घुसरे संगी,  दू पइसा घला न आवय । काम-बुता बिन पइसा नइ हे, पइसा बिन कुछु ना भावय ।। दूनों कोती ले मरना हे, कइसे के जीबो संगी । घुसर-घुसरे घर मा मरबो, बाहिर कोरोना जंगी ।। ऊँपर वाले कुछु तो सोचव , कइसन हे तोर तमासा । जीयन देबे ता जीयन दे,  टूटत हे तोरे आसा ।।

भूख लगे मा खाना चाही, प्यास लगे  मा तो पानी । सही उमर मा बिहाव करले, जागे जब तोर जवानी ।। सही समय मा खातू-माटी, धान-पान ला तो चाही । खेत जरे मा बरसे पानी,  कइसे के सुकाल लाही । अपन गो...

//गीत// टूरा- खुल्ला चुन्दीवाली टूरी, सपना मा आवत हे रे । मोरै तन मन के बादर मा, बदरी बन छावत हे रे ।। टूरी- लंबा चुन्दी वाले टूरा, सपना मा आवत हे रे । मोरे तन मन के बदरी मा, बादर बन छावत हे रे ।। टूरा- चढ़े खोंजरारी चुन्दी हा, माथा मा जब-जब ओखर । घेरी-बेरी हाथ हटाये, लगे चेहरा तब चोखर । झमझम बिजली चमकय जइसे, चुन्दी चमकावत हे रे । खुल्ला चुन्दीवाली टूरी, सपना मा आवत हे रे । .टूरी- फुरुर-फुरुर पुरवाही जइसे, झुलुप केस हा बोहावय । जेने देखय अइसन बैरी, ओखर बर तो मोहावय । चिक्कन-चांदन गाल गुलाबी, घात नशा बगरावत हे रे । लंबा चुन्दी वाले टूरा, सपना मा आवत हे रे । टूरा- खुल्ला चुन्दीवाली टूरी, सपना मा आवत हे रे । मोरै तन मन के बादर मा, बदरी बन छावत हे रे ।। टूरी- लंबा चुन्दी वाले टूरा, सपना मा आवत हे रे । मोरे तन मन के बदरी मा, बादर बन छावत हे रे ।।

जोहत-जोहत रद्दा तोरे, आँखी मोरे प थरा गे । दुनिया भर मा घूमत हस तैं, मोरे अँगना कब आबे । ओ अषाढ़ के जोहत-जोहत, आसो के सावन आगे । नदिया-तरिया सुख्खा-सुख्खा, अउ धरती घला अटागे । रिबी-...

लइका दाई के दूध पिये, दाई-दाई चिल्लाथे । आया डब्बा के दूध पिये, अपने दाई बिसराथे।। जेने दाई अपने लइका, गोरस ला नई पियाये। घेरी-घेरी लालत ओला, जेने ये मान गिराये ।। सभ्य बने के चक्कर मा जे, अपन करेजा बिसराये । बोलव दुनिया वाले कइसे, ओही हा सम्य कहाये ।। दाई के गोरस कस होथे, देश राज के भाखा । पर के भाखा ओदर जाही, जइसे के छबना पाखा ।। म्याऊ-म्याऊ बोल-बोल के,  बिलई बनय नही तोता। छेरी पठरू संग रही के, बघवा होय नही थोथा ।। अपने गोरस अपने भाखा, अपने लइका ला दे दौ । देखा-सेखी छोड़-छाड़ के, संस्कारी बीजा बो दौ ।

कुकुभ छंद जेन पेड़ के जर हे सुध्घर, ओही पेड़ ह लहराथे। जर मा पानी डारे ले तो, डारा पाना हरियाथे ।। नेह पोठ होथे जे घर के, ओही घर बहुत खटाथे । उथही होय म नदिया तरिया, मांघे फागुन म अटाथे ।। ढेला पथरा ला ठोके मा, राईं-झाईं हो जाथे । कच्चा माटी के लोंदा ले, करसी मरकी बन जाथे । जेन पेड़ ठांढ़ खड़े रहिथे, झोखा पाये गिर जाथे । लहर लहर हवा संग करके, नान्हे झांड़ी इतराथे ।। करू कस्सा कस बोली बतरस, जहर महूरा कस होथे । मीठ गोठ के बोली भाखा, सिरतुन अमरित रस बोथे। जिहां चार ठन भड़वा बरतन, धोये मांजे मा चिल्लाथे । संगे जुरमिल एक होय के, रंधहनी कुरिया मा जाथे ।। जेन खेत के मेढ़ साफ हे, ओही हा खेत कहाथे । मनखे ला जे मनखे मानय, मनखे ओही बन जाथे ।।