श्रृंगार दोहागीत जिंस पेंट फटकाय के, निकले जब तैं खोर । लिच लिच कनिहा हा करे, ऐ ओ गोरी तोर ।। देख देख ये रेंगना, कउँवा करें न काँव । मुक्का होगे मंगसा, परे तोर जब छाँव ।। देखइया देखत हवय, अपने आँखी फोर । लिच लिच कनिहा हा करे, ऐ ओ गोरी तोर ।। बरसउ बादर जस दिखे, लहरावत ये केश । मटक-मटक के रेंग के, मारे जब तैं टेश ।। रूप-रंग के तोर तो, गली-गली मा छोर । लिच लिच कनिहा हा करे, ऐ ओ गोरी तोर ।। नाजुक होगे गाल हा, केश करे जब चोट । लाल फूल दसमत खिले, अइसे तोरे ओट ।। छल-छल तो छलकत हवय, मुच-मुच मधुरस घोर । लिच लिच कनिहा हा करे, ऐ ओ गोरी तोर ।। दूनो भौं के बीच मा, चंदा आय लुकाय । सुरूज अपन रोषनी, तोरे मुँह ले पाय ।। नील कमल हा हे खिले, तोरे आंखी कोर ।। लिच लिच कनिहा हा करे, ऐ ओ गोरी तोर ।। अइसन सुंदर तैं दिखे, मिले नहीं उपमान । जेने उपमा ला धरॅंव, होथे तोरे अपमान ।। रोम-रोम बस ये कहय, तैं हा सपना मोर । लिच लिच कनिहा हा करे, ऐ ओ गोरी तोर ।। - रमेशकुमार सिंह चौहान

तोर आँखी के, ये गुरतुर बोली । चुपे-चुप करथे, जब़ हँसी ठिठोली । देह धरती मा, मन उड़े अगासा । मया मा तोरे, जीये के आसा ।।

                मया (भुजंगप्रयात छंद, अतुकांत) कहां देह के थोरको मोल होथे । मया के बिना देह हाड़ा निगोड़ा ।। मया के मया ले मया देह होगे । मया साँस मोरे मया प्राण मोरे ।। करे हे मया हा मया मा मया रे । मया के मया मा महूँ हा मया गा ।। मया ला मया ले करे मैं निहोरा । मया धार ड़ोंगा मया ड़ोंगहारे ।। मया मोर बोली मया मोर हाँसी । मया भूख मोरे मया प्यास मोरे ।। मया भूख के तो मया हा चबेना । पियासे मया के मया मोर पानी ।। मया मोर आँखी मया मोर काने । मया हाथ मोरे मया गोड़ मोरे ।। मया साँस मोरे मया हे करेजा । मया जिंदगानी मया मुक्ति रद्दा ।।