गोड के साटी नंदा गे, हाथ के चुरी हरागे, मुड़ी के चुंदी कटागे, अब टूरी मन के । माथा के टिकली हर, नाक मा उतर गे हे, कुतर दे हे चेंदरा, मुसवा फेसन के ।। पहिने हे टिप टाप, छोटे-छोटे छांट-छांट, मोबाइल धरे हाथ, गोठ लमावत हे । तन आधा हे उघरा, मुॅह मा तोपे चेंदरा, सरर सरर कर, गाड़ी चलावत हे ।।

1. का होगे तोला मन लइ लागे हे काम बुता मा कोनो चोरा ले हे का मया देखा के। 2. मया के फांदा मैं हर फसे हंव आंखी ला खोले निंद मा सुते हंव देखत ओला । 3. तोर आंखी मा उतर के देखेंव थाह नइ हे डूबत हंव ओमा मया के मारे । 4. दिल हरागे मया मा सना के गा बेजान देह गारी देवा के गल्ला का मतलब ।

ओही सूरज चांद हे, ओही हे आकाश। कहे जमाना गे बदल, कोन करे विश्वास ।। कोन करे विष्वास, बिना पाछू आघू हे। नेह बिना घर द्वार, लगे कोनो जादू हे ।। डोरी बिना पतंग, गगन मा कदर ल खोही । उलंबा तोर सोच, जगत ओही के ओही ।।

होथे डर अउ भूत हा, छू छूवाल कस दांव। घाम अंजोर के परे, मिट जाथे गा छांव ।। मिट जाथे गा छांव, रहय जब तक घाम बने । कमी घाम के होय, लगे ओ काजर म सने ।। अंतस भीतर तोर, शक्ति के सूरज सोथे । जावय ओ जब जाग, तभे गा बिहान होथे ।।

रहिबे गा जब तैं बने, बने लगहि संसार । तन मन बिगड़े तोर जब, होही जग बेकार ।। होही जग बेकार, हवय दुनिया हर अइसे। फेके ले अब काम, दूध के माछी जइसे ।। सुवारथ के ‘रमेश‘, कोन ला का कहिबे । रख अपने ले काम, बने तब तै हर रहिबे ।।

बेटा मोरे बात सुन, खोल अपन तै कान । दौलत पाछू भाग झन, दौलत बड़े इमान । दौलत बड़े इमान, शांति सुख तन मन भरथे । मनखे ल कहय कोन, खुदा ला बस मा करथे ।। कर मत बिगड़े काम, परे कोखरो सपेटा । दु पइसा के लोभ, पेर ही तोला बेटा ।

आवत जावत एक दिन, देखेंव एक हूर । देखत देखत बिसर गय, मोरे अपने सूर ।। मोरे अपने सूर, रात दिन देखय सपना । झूलय आंखी मोर, ओखरे मुच मुच हॅसना । फूले फूले गाल, घात सुघ्घर हे भावत । हिरणी बानी चाल, फूतके आवत जावत ।।

आॅंखी सपना तै सजा, अपन भाग झन कोस । चमक दमक रख चेहरा, मन मा भर ले जोष ।। मन मा भर ले जोश, काम दम भर कर ले । भाग करम के दास, अपन तै मुठ्ठी भर ले ।। छू ले बादर आज, खोल के डेना पांखी । दुनिया होही तोर, देख ले खोले आंखी ।।

भ्रस्टाचारी हे सबो, थोर थोर हे फेर । कोनो जांगर के करे, कोनो पइसा हेर ।। कोनो पइसा हेर, काम सरकारी करथे । ले परसेंटेज, जेब अपने वो भरथे ।। हवय रे काम चोर, करमचारी सरकारी । बिना काम के दाम, लेत हें भ्रस्टाचारी ।। सरकारी सब काम मा, कागज के हे खेल । कागज के डोंगा बने, कागज के गा रेल ।। कागज के गा रेल, उड़ावत हवे हवा मा । वेंटिलेटर मरीज, जियत हे जिहां दुवा मा ।। इक पइसा के काम, होय गा जिहां हजारी । काम उही ह कहाय, हमर बर तो सरकारी ।।

ओही ओही बात ला, कहय ददा हा रोज । झन जा बेटा ओ डगर, जाना गा तैं सोज ।। जाना गा तैं सोज, छोड़ संगती के तलब । अपन काम ले काम, कोखरो से का मतलब । कहे हवय ग ‘रमेश‘, मुड़ी धर के ओ रोही । लोफड़ लम्पट संग, परे हे ओही ओही ।।