छत्तीसगढ़ी भाषा अउ छत्तीसगढ़ के धरोहर ल समर्पित रमेशकुमार सिंह चौहान के छत्तीसगढ़ी काव्यांजली
नवा सोच के नवा साल के बधाई
(दुर्मिल सवैया)
मनखे मनखे मन खोजत हे, दिन रात खुशी अपने मन के ।
कुछु कारण आवय तो अइसे, दुख मेटय जेन ह ये तन के ।
सब झंझट छोड़ मनावव गा, मिलके कुछु कांहि तिहार नवा ।
मन मा भर के सुख के सपना, सब कोइ मनावव साल नवा ।।
-रमेश चौहान
तोर गुस्सा तोर आगी, करय तोला खाक ।
तोर मन हा बरत रहिही, देह होही राख ।।
सोच संगी फायदा का, आन के अउ तोर ।
हाथ दूनो रोज उलचव, मया मन मा जोर ।।
-रमेश चौहान
उत्ती के बेरा जइसे
सुरता तोरे जागे हे
मन के पसरे बादर म
सोना कस चमकत हे
मोरे काया के धरती म
अंग-अंग चहकत हे
दरस-परस के सपना मा
डेना-पांखी लागे हे
सुरता के खरे मझनिया
देह लकलक ले तिपे हे
अंतस के धीर अटावत
मया तोरे लिपे हे
अंग-अंग म अगन लगे
काया म मन छागे हे
तोर हंसी के पुरवाही
सुरता म जब बोहाय
आँखी के बोली बतरस
संझा जइसे जनाय
आँखी म आँखी के समाये
आँखी म रतिहा आगे हे
