घाम करे अतका अब तो धरती अॅंगरा कस लागय गा । हो ठुड़गा अब ठाढ़ खड़े रूखवा नॅंगरा कस लागय गा ।। बंजर  हे नदिया नरवा तरिया अउ बोर कुॅंआ नल हा।। हे तड़पे मछरी कस कूदत नाचत ये मनखे दल हा ।

कइसे भरही भेट, हाथ मा हाथ धरे ले । काम बुता ला देख, मने मन तोर जरे ले । तर तर जब बोहाय, पसीना  देह म तोरे । चटनी मिरचा नून, सुहाही बासी बोरे । फुदक फुदक चिरई घला, दाना पानी खोजथे । जंगल के बघवा कहां, बइठे बइठे बोजथे ।।

छत्तीसगढ़ दाई के, परत हंन पांव ला । जेखर लुगरा छोरे, बांटे हे सुख छांव ला । पथरा कोइला हीरा, जेन भीतर मा भरे । सोंढुर अरपा पैरी, छाती मा अपने धरे ।। जिहां के रूख राई मा, बनकठ्ठी गढ़े हवे । जिहां के पुरवाही मा, मया घात घुरे हवे ।। अनपढ़ भले लागे, इहां के मनखे सबे । फेर दुलार के पोथी, ओखर दिल मा दबे ।। छत्तीसगढि़या बेटा, भुईंया के किसान हे। जांगर टोर राखे जे, ओही हमर शान हे ।।

मनखे केे अपराध, भोगथे मोटर गाड़ी । हर थाना मा देख, खड़े हे बने कबाड़ी ।। मोरो मन अभिलाष, सड़क मा घूमव फर फर । मनखे हे आजाद, कैद मा हा हँव काबर ।। कतका साधन देश के, काबर गा बरबाद हे । ...

चिंता होथे देख के, टूटत घर परिवार । पढ़े लिखे पति पत्नि मन, झेल सहे ना भार ।। जानय ना कर्तव्य ला, चाही बस अधिकार । बात बात मा हो अलग, मेट डरे परिवार ।। मांग भरण पोषण अलग, नोनीमन बउराय । टूरा मन हा दारू पी, अपने देह नसाय ।। राम लखन के देश मा, रावण के भरमार । गली गली मा हे भरे, सूर्पनखा हूंकार ।। कहे कहां मंदोदरी, रावण, बन तैं राम । बात नई माने कहूं, जाहूं मयके धाम ।। सूर्पनखा ला देख के, राम कहे हे बात । बसे हवय मुड़ गोड़ ले, सीता के जज्बात ।। रोठ रोठ किताब पढ़े, राम कथा ला छोड़ । अपन सुवारथ मा जिये, अपने नाता तोड़ ।।

घाट सुन्ना बाट सुन्ना, खार सुन्ना गांव मा । झांझ झोला झेल झर झर, छांव मिलय न छांव मा ।। गाय गरूवा होय मछरी, रोय तड़पत पार मा । आदमी बेहाल होगे, घाम के ये मार मा ।। बूॅंद भर पानी नई हे, बोर नल सुख्खा परे । ओ कुॅआ अउ बावली हा, का पता कबके मरे । छोड़ मनखे गोठ तैं हर,जीव जोनी ले तरय । पेड़ रूख के जर घला हा, भोमरा मा जर मरय ।

चारे मछरी के मरे, तरिया हा बस्साय । बने बने भीतर हवय, बात कोन पतियाय ।। सच ठाढ़े अपने ठउर, घूमय झूठ हजार । सच हा सच होथे सदा, झूठ सकय ना मार ।। बुरा बुरा तैं सोचथस, बुरा बुरा ला देख । बने घला तो हे इहां, खोजे मा अनलेख ।। अपन करम ला सब करव, देखव मत मिनमेख । देखे मा गलती दिखय, तोरे मा अनलेख ।। जइसे होथे सोच हा, तइसे होथे काम । स्वाभिमान राखे रहव, होही तोरे नाम ।।

टपकत पानी बूंद ला, पी ले तैं खोल । टपकत पानी बूंद हा, खोलत हावे पोल । खोलत हावे पोल, नदानी हमरे मन के । नरवा नदिया छेक, बसे हे मनखे तन के ।। पाटे कुॅवा तलाब, बोर खनवाये मटकत । सुख्खा होगे बोर, कहत हे पानी टपकत ।।

श्रद्धा अउ विश्वास हा, आथे अपने आप । कथरी ओढ़े घीव पी, राम नाम ला जाप ।। गलती ले जे सीखथे, अनुभव ओखर नाम । जीवन के पटपर डगर, आथे वोही काम ।। उल्टा तोरे सोच के, दिखय कहू गा बात । गुस्सा मन मा फूटथे, लाई कस दिन रात ।। एक होय ना मत कभू, जुरे चार विद्वान । अपन अपन के तर्क ले, बनथे खुदे महान ।। एक करे बर सोच ला, सुने ल परथे गोठ । सुन दूसर के गोठ ला, मनखे होथे पोठ ।। दवा क्रोध के एक हे, सहनशील मन होय । क्षमा दान ला मान दै, शांति जगत मा बोय ।। दिखय नही चेथी अपन, करलव लाख उपाय । गलती चेदी मा बसय, कइसे लेब नसाय । देखे बर मुॅह ला अपन, दर्पण चाही एक । अपने चारी जे सुनय, बन जाथे ओ नेक ।। कहिना कोनो बात ला, घात सहज मन मोय । काम करे बर कोखरो, जांगर नई तो होय ।। आंखी होथे तीन ठन, दू जग ला देखाय । तीसर आंखी मन हवय, अपने देह जनाय ।।

ममता चंद्राकरजी ला पद्मश्री से सम्मानित होय बर गाड़ा-गाड़ बधाई - ममता दी के मान ले, माथा ऊंचा होय । छत्तीसगढ़ी बर इहां, जेने मही बिलोय ।। जेने मही बिलोय, घीव ला बांटे घर-घर । लता कोयली होय, गीत ला गाये झर-झर ।। छत्तीसगढ़ी आन, रखे हे अपने क्षमता । जेन हमर पहिचान, नाम ओखर हे ममता । -रमेश चौहान