रमेश चौहान के छत्‍तीसगढ़ी कविता

जापानी विधा । हाइकू, तांका, चोका । देश मा छाये ।। कोन हे इहां छंद के पूछईया । कोन बताये । ये मोर देश मोर अपने आय घात सुहाये । देश के माटी पुराना परिपाटी आज नंदाये । नवा लहर मचाये हे कहर जुन्ना ला खाये । कोन देखे हे मौसम बदले मा आने धरती । कोनो पेेड मा नवा पत्ती के आये नवा जर हे । टुकना तोपे कोन डोकरा राखे काला ये भाते ।

खोजव खोजव चोर ला, कोने मेर लुकाय । करके आघू आन ला, कइसे के भरमाय ।। दिखथे हमला मोहरा, हवय शकुनि के चाल । पै बारा ला देख के, होगे बारा हाल ।। काट मोहरा फेकथन, लेथे नवा बनाय । खोजव खोजव चोर ला...... कट्टरता के देह के, आतंकवाद नाम । जात धरम जानय नही, मारे ले हे काम ।। सोचे के तो बात हे, कट्टर कोन बनाय । खोजव खोजव चोर ला... जर मा पानी पाय के, बिरवा बनथे झाड़ । काटव जर ला खोज के, बाते लेवव ताड़ ।। मारव अइसन सोच ला, कट्टर जेन बनाय । खोजव खोजव चोर ला....

आल्‍हा छंद मनखे होके काबर मनखे, मनखे ला अब मार गिराय । जेती देखव तेती बैरी, मार काट के लाश बिछाय ।। मनखे होके पथरा लागे, अपन करेजा बेचे आय । जीयत जागत रोबोट बने, आका के ओ हुकुम बजाय ।। मनखे होके काबर मनखे, मनखे ला अब मार गिराय । जेती देखव तेती बैरी, मार काट के लाश बिछाय ।। मनखे होके पथरा लागे, अपन करेजा बेचे खाय । जीयत-जागत जींद बने ओ, आका के सब हुकुम बजाय ।। ओखर मन का सोच भरे हे, अपनो जीवन देत गवाय । काबर बाचा माने ओ हा, हमला तो समझ नई आय ।। चार आदमी मिल के कइसे, दुनिया भर ला नाच नचाय । लगथे कोनो तो परदा हे, जेखर पाछू बहुत लुकाय ।। रसद कहां ले पाथे ओमन, बइठे बइठे जउने खाय । पाथे बारूद बम्म कहां ले, अतका नोट कहां ले आय ।। हमर सुपारी देके कोने, घर बइठे-बइठे मुस्काय । खोजव संगी अइसन बैरी, आतंकी तो जउन बनाय । चार आतंकी के मारे ले, आतंकी तो नई सिराय । जेन सोच ले आतंकी हे, तेन सोच कइसे मा जाय ।। कब तक डारा काटत रहिबो, जर ला अब खन कोड़ हटाव । नाम रहय मत ओखर जग मा, अइसन कोनो काम बनाव ।। -रमेश चौहान

तुलसी चौरा अंगना, पीपर तरिया पार । लहर लहर खेती करय, अइसन गांव हमार ।। गोबर खातू डार ले, खेती होही पोठ । लइका बच्चा मन घला, करही तोरे गोठ ।। गउचर परिया छोड़ दे, खड़े रहन दे पेड़ । चारा चरही ससन भर, गाय पठरू अउ भेड़ ।। गली खोर अउ अंगना, राखव लीप बहार । रहिही चंगा देह हा, होय नही बीमार  ।। मोटर गाड़ी के धुॅंवा, करय हाल बेहाल । रूख राई मन हे कहां, जंगल हे बदहाल ।। -रमेश चौहान

दोहा चिट-पट  दूनों संग मा, सिक्का के दू छोर । देवारी के आड़ मा, दिखे जुआ के जोर ।। डर हे छुछवा होय के, मनखे तन ला पाय । लक्ष्मी ला परघाय के, पइसा हार गवाय ।। कोन नई हे बेवड़ा, जेती देख बिजार। सुख दुख ह बहाना हवय, रोज लगे बाजार ।। कहत सुनत तो हे सबो, माने कोने बात । सबो बात खुद जानथे, करय तभो खुद घात ।। -रमेश चौहान

अपने मन के कोनहा, अइसे दीया बार । रिगबिग रिगबिग तो दिखय, तोरे अवगुण झार ।। अपन कमी ला जान के, काही करव उपाय । बाचय मत एको अकन, मन मा तोरे समाय ।। देवारी दीया हाथ धर, अवगुण ला तैं मार । अपने मन के कोनहा... हमरे सुधरे मा जगत, सुधरय पक्का जान । छोड़ गरब गुमान अपन, छोड़ अपन अभिमान ।। अपन मया के बंधना, बांधव जी संसार ।। अपने मन के कोनहा... तोरे कस तो आन हे, सुघ्घर के इंसान । ना कोनो छोटे बड़े, ना कोनो हैवान ।। हवय भुले भटके भले, ओला तैं सम्हार । अपने मन के कोनहा... जाति पाति अउ पंथ के, कर देबो अब अंत । मनखे  हा मनखे रहय, मन से होबो संत ।। राम राज के कल्पना, करबो हम साकार । अपने मन के कोनहा...

जय जय हे धनवंतरी, दव हमला वरदान । स्वस्थ रहय तन मन हमर, स्वस्थ रहय सम्मान ।। धनतेरस के ये परब, आय जनम दिन तोर । हाथ जोड़ परनाम हे, विनती सुन ले मोर ।। भौतिकता के फेर मा, हम तोला बिसराय । जड़ी बुटी ला छोड़ के, धन के परब बनाय ।। हवय घोर गलती हमर, धरत हवन हम कान । आसो ले अब हर बरस, करबो तोरे मान ।। साफ सफाई राखबो, हम अपने घर द्वार । रखिहंव हमरे ध्यान तुम, होई मत बीमार ।।