रमेश चौहान के छत्‍तीसगढ़ी कविता

गाँव होवय के शहर मा, एक सबके चाल हे ।। रोज दरूहा के गदर मा, आदमी बेहाल हे ।। हे मचे झगरा लड़ाई, गाँव घर परिवार मा ।। रोज के परिवार टूटय, दारू के ये मार मा ।। रात दिन सब एक हावे,, देख दरूहा हर गली । हे बतंगड़ हर गली मा, कोन रद्दा हम चली । जुर्म दुर्घटना घटे हे, आज जतका गाँव मा । देख आँखी खोल के तैं, होय दरूहा दाँव मा ।। सोच ले सरकार अब तैं, दारू के ये काम हे । आदमी बेहाल जेमा, दाग तोरे नाम हे ।। दारू भठ्ठी बंद कर दे, टेक्स अंते जोड़ दे । पाप के हे ये कमाई,  ये कमाई छोड़ दे । आदमी के सरकार तैं हा, आदमी खुद मान ले । आदमी ला आदमी रख, आदमी ला जान ले ।। काम अइसे तोर होवय, आदमी बर आदमी । आदमी के कर भलाई, हस तभे तैं आदमी ।। -रमेश चौहान

हर जात ले, हर धर्म ले, आघू खड़े, ये देश । हे मोर ले, अउ तोर ले, बड़का बड़े, ये देश ।। सम्मान कर, अभिमान कर, तैं भुला के, खुद क्लेष । ये मान ले, अउ जान ले, हे तोर तो, ये देश ।। विरोध करव, सरकार के, जनतंत्र मा, हे छूट । पर देश के, तै शत्रु बन, सम्मान ला, झन लूट ।। पहिचान हे, अभिमान हे, हमर सैनिक, हे वीर । अपन धरती, अउ देश बर, डटे रहिथे, धर धीर ।। -रमेश चौहान

छाती ठोक के, मांग करव अब, काम के अधिकार । हर हाथ मा तो, काम होवय, रहब न हम लचार ।। हर काम के तो, दाम चाही, नई लन खैरात । हो दाम अतका, पेट भर के, मिलय हमला भात ।। खुद गुदा खाथे, देत हमला, फोकला ला फेक । सरकार या, कंपनी हा, कहां कोने नेक ।। अब काम के अउ, दाम के तो, मिलय गा अधिकार । कानून गढ़ दौ, एक अइसन, देश के सरकार ।।

फोकट मा झन बाँट तैं, हमर चुने सरकार । देना हे ता काम दे, जेन हमर अधिकार ।। जेन हमर अधिकार,  तोर कर्तव्य कहाये । स्वाभिमान ला मार, सबो ला ढोर बनाये  ।। पैरा-भूसा डार, अपन बरदी मा ठोकत ।  लालच हमर जगाय, लोभ मा बाँटत फोकट ।। फोकट फोकट खाृय के, मनखे होत अलाल । स्वाभिमान हा मरत हे, काला होत मलाल ।। काला होत मलाल, निठल्ला हवय जवानी । काम-बुता ना हाथ, करत शेखी शैतानी । पइसा पावय चार, अपन जांगर ला झोकत । अइसे करव उपाय, बाँट मत अब कुछु फोकट ।। -रमेशकुमार सिंह चौहान

बिना तेल के दीया-बाती, हे मुरझाय परे । बिना प्राण के काया जइसे, मुरदा नाम धरे ।। मया बिना जीवन कइसे, अपने दम्भ भरे । घाम-छाँव जीवन के जतका, सब ला मया हरे ।।

निंद अपन आँखी मा आथे, अपन मुँह मा स्वाद । सुख ला बोहे हाँस-हाँस के, दुख ला घला लाद ।। अपने कोठी अपने होथे, आन के हर भीख । नीत-रीत दूसर बर काबर, खुदे येला सीख ।। -रमेश चौहान

जय जय दाई नवागढ़ के, जय जय महामाय करत हवँव गोहार दाई, सुन लेबे पुकार । एक आसरा तोर हावे, पूरा कर दुलार ।। दुनिया वाले कहँव काला, मारत हवय लात । पइसा मा ये जगत हावे, जगत के ये बात ।। लगे काम हा छूट गे हे, परय पेट म लात । बिना बुंता के एक पइसा, आवय नही हाथ ।। काम बुता देवय न कोनो,  देत हे दुत्कार । करत हवँव गोहार दाई, सुन लेबे पुकार । नान्हे-नान्हे मोर लइका, भरँव कइसे पेट । लइकामन हा करय रिबि-रिबि, करँव कइसे चेत ।। मोर पाप ला क्षमा करदौं, क्षमा कर दौ श्राप । काम-बुता अब हाथ दे दौ, कहय लइका बाप ।। काम-बुता अउ बिना पइसा, हवय जग बेकार । करत हवँव गोहार दाई, सुन लेबे पुकार । करत हवँव गोहार दाई, सुन लेबे पुकार । एक आसरा तोर हावे, पूरा कर दुलार ।।

मिलत नई हे गाँव मा, टेक्टर एको खोजे । खेत जोतवाना हवय, खोजत हँव मैं रोजे ।। बोवाई हे संघरा, नांगर हा नंदागे । नवा जमाना खेती नवा, नवा जमाना आगे ।।

मिलत हवय ना हमर गांव मा, अब बनिहार गा । कहँव कोन ला सुझत न कूछु हे, सब सुखियार गा ।। दिखय न अधिया लेवइया अब, धरय न रेगहा । अइसइ दिन मा हमर किसानी, बनय न थेगहा ।।

बुता काम बिना दाम, मिलय नही ये दुनिया । लिखे पढ़े जेन कढ़े, ओही तो हे गुनिया ।। बने पढ़व बने कढ़व, शान-मान यदि चाही । पूछ परख तोर सरख, होही जब कुछु आही ।