कहमुकरिया (कहमुकरिया एक छंद होथे, जेमा 16, 16 मात्रा के चार चरण होथे, ये एक अइसन विधा आय जेमा एक सहेली अपन प्रियतम के वर्णन करथे अउ अपन सखी ले पूछथे, जब ओखर सखी हा, उत्तर मा साजन कहिथे तो ओ हा मुकर जाथे अउ आने उत्तर बता देथे, ये विधा मा रचनाकार अउ पाठक के बीच एक जनउला हो जथे) 1. रहिथे दिन रात संग मोरे, गोठ बात मा राखे बोरे । संग ओखरे करथव स्माइल । का सखि ? साजन ! ना सखि मोबाइल ।। 2. मोर अकेल्ला के संगी हे, ज्ञान जेखरे सतरंगी हे । जेखर आघू मैं नतमस्तक । का सखि ? साजन ! ना सखि पुस्तक ।

टाॅठ टाॅठ जिन्स पेंट पहिरे, अउ हल हल ले चूरी । बादर कस चुन्दी बगराये, चमकत रेंगय टूरी ।। पुन्नी के चंदा कस मुहरन, गली गली देखाये । अपन देह के रूआब गोरी, डहर डहर बगराये । काजर आंजे आंखी कारी, टूरा मन बर छूरी । बादर कस चुन्दी बगराये, चमकत रेंगय टूरी ।। तन के चुनरी पाछू टांगे, बेग हाथ लटकाये । गली गली हरहिंछा घूमे, कनिहा ला मटकाये । धरे जवानी बरखा आगे, छम छम नाचे मयूरी । बादर कस चुन्दी बगराये, चमकत रेंगय टूरी ।। टाॅठ टाॅठ जिन्स पेंट पहिरे, अउ हल हल ले चूरी । बादर कस चुन्दी बगराये, चमकत रेंगय टूरी ।।

रोला छ़द अपन देश के फर्ज. हमू मन आज निभाबो । कामबुता के संग. देश के गीत ल गाबो । देशभक्त ला देख. फूल कस बिछ जाबो । आघू बैरी देख. हमन बघवा बन जाबो ।। -रमेश चौहान

झंड़ा लहरावव, जनमन गावव, गणतंत्र परब, हे मान बने।  घर कुरिया झारव, दीया बारव, देवारी जस, मगन बने ।।  हिन्दू ईसाई, मुस्लिम भाई, जय हिन्द बोल, बोल  बने । हे पावन माटी, अउ परिपाटी,  जुरमिल देखा, जग ल बने ।।

गीतिका छंद छेरछेरा के परब हे, धान कोदो हेर दौ । अन्न देके अन्न पाबे, छेरछेरा मान लौ ।। मान होथे दान दे ले, दान ले हे मान गा । होय ना उन्ना कभू गा, तोर कोठी जान गा ।।

1- एक बेटा होके दाई बर शेर होगे । बहिनी बर कइसे तै ह गेर होगे ।। एक अनचिनहार नोनी ला पाये तैं बघवा होके आज ढेर होगे ।। 2- ददा दाई के खूब सुने भाई भौजी ला घला गुने सास ससुरार ला पाये काबर अपन माथा धुने ।। -रमेश चौहान

डहत सुवारी मोर हे, मइके मा तो जाय । पांव परे मा गा घलो, ससुरे ना तो आय ।। मोर गांव मा पूछ लव, सीधा साधा आॅव । दारू मंद ला छोड़ दे, मैं ना पान चबाॅव ।। अपन काम ले काम हा, मोला बने सुहाय । डहत सुवारी मोर हे.. काबर करे बिहाव हे, जाने ना भगवान । कतको बेरा देख ले, मारे केवल शान ।। देखय ना बोलय कभू, मोला मया लगाय । डहत सुवारी मोर हे .. केवल एके मांग हे, दाई ददा ल छोड़ । मोरे मइके मा चलव, ऐती नाता तोड़ । देख लेंव मैं जाय के, तभो ना तो भाय । डहत सुवारी मोर हे.. पढ़े लिखे के साध मा, माथा अपन ठठाॅव । धर डंडा कानून के, करे ओ काॅव-काॅव । कानून हवय अंधरा, कोन भला समझाय । डहत सुवारी मोर हे.. दुनिया दारी मा अभे, मोर लगे ना चेत । मरना जीना काय हे, जस नदिया के रेत ।। अपन खुदे के छाॅव हा, चाबे बर दउडाय । डहत सुवारी मोर हे..

देख देख ये फोटु ला, पारत हे गोहार । बीता भर लइका इहां, गढ़त हवय संसार ।। लादे अपने पीठ मा, नान्हे भाई छांध । राखे दूनो हाथ मा, पाने ठेला बांध।। दूनो झन के पेट बर, बोहे जम्मा भार । देख देख ये फोटु ला... अइसन का पीरा हवय, ओखर आंखी देख । कहां ददा दाई हवय, दिखे भाग के लेख ।। आंसु धरे अनाथ मनन, होय आज लाचार । देख देख ये फोटु ला... मात देत हे काल ला, लइका के ये सोच । करम बड़े अधिकार ले, दूसर ला झन नोच ।। भीख कटोरा ना धरय, जांगर लय सम्हार । देख देख ये फोटु ला... लइका के तजबीज ला, कोरा अपन उठाव । बनके अब दाई ददा, लव बचपना बचाव ।। धरम करम के देष मा, होही बड़ उपकार । देख देख ये फोटु ला...

हम छत्तीसगढि़या आन रे, छाती मा चढ़ जाबो । जेन हमर हक लूटय तेला, जुरमिल नगद ठठाबो ।। सीधा-सादा बर हम सीधा, घर अॅगना तो ओखर । जम्मो दुनिया हा जाने हे, हमरे संगत चोखर । नंगरा बनय जेन हमर बर, हमू नंगरा बन जाबो ।। जेन हमर हक लूटय तेला, जुरमिल नगद ठठाबो ।। छत्तीसगढ़ी बोली भाखा, हमर करेजा-चानी। कइसे कोनो कर लेही अब, इहां अपन मनमानी ।। अपन आन-बान शान बर हम, जिनगी दांव लगाबो । जेन हमर हक लूटय तेला, जुरमिल नगद ठठाबो ।। महानदी के निरमल पानी, जहर जेन हे घोरे । हमर चार तेंदु जबरदस्ती, आके जेने टोरे । अइसन बैरी के टोटा धर, गली गली घूमाबो । जेन हमर हक लूटय तेला, जुरमिल नगद ठठाबो ।।

दाई के गोरस असन, छत्तीसगढी बोल । तोर मोर रग मा भरे, देखव ऑखी खोल ।। हमरे भाखा मा घुरे, दया मया भरपूर । मनखे मनखे मन रहय, मनखेपन मा चूर ।। चाउर पिसान घोर के, लई बना ले फेट । गरम चिला हाथ मा, चटनी संग लपेट ।। धनिया मिरचा संग ले, शील लोढिया घीस । बंगाला ला डार के, मन लगा के पीस ।। गुल गुल भजिया छान ले, दे करईहा तेल । गरम गरम धर हाथ मा, गबर गबर तैं झेल ।। -रमेश चौहान