दाई बहिनी गाँव के, पारत हे गोहार ।
दारू भठ्ठी बंद हो, बचै हमर परिवार ।।
बचै हमर परिवार, मंद मा मत बोहावय ।
लइका हमर जवान, इही मा झन बेचावय ।।
जेखर सेती वोट, हमन दे हन गा भाई ।
वादा अपन निभाव, कहत हे बहिनी दाई ।।
-रमेश चौहान
तुलसी चौरा अंगना, पीपर तरिया पार । लहर लहर खेती करय, अइसन गांव हमार ।। गोबर खातू डार ले, खेती होही पोठ । लइका बच्चा मन घला, करही तोरे गोठ ।। गउचर परिया छोड़ दे, खड़े रहन दे पेड़ । चारा चरही ससन भर, गाय पठरू अउ भेड़ ।। गली खोर अउ अंगना, राखव लीप बहार । रहिही चंगा देह हा, होय नही बीमार ।। मोटर गाड़ी के धुॅंवा, करय हाल बेहाल । रूख राई मन हे कहां, जंगल हे बदहाल ।। -रमेश चौहान
टिप्पणियाँ
एक टिप्पणी भेजें