मैं सबले सुघ्घर हवंव, तैं घिनहा बेकार ।
राजनीति के गोठ मा, मनखे होत बिमार ।
मनखे होत बिमार, राजनेता ला सुनके ।
डारे माथा हाथ, भीतरे भीतर गुणके ।।
सुनलव कहय रमेश, रोग अइसन कबले ।
नेता हमरे पूत, कहां सुघ्घर मैं सबले ।।
- रमेश चौहान
तुलसी चौरा अंगना, पीपर तरिया पार । लहर लहर खेती करय, अइसन गांव हमार ।। गोबर खातू डार ले, खेती होही पोठ । लइका बच्चा मन घला, करही तोरे गोठ ।। गउचर परिया छोड़ दे, खड़े रहन दे पेड़ । चारा चरही ससन भर, गाय पठरू अउ भेड़ ।। गली खोर अउ अंगना, राखव लीप बहार । रहिही चंगा देह हा, होय नही बीमार ।। मोटर गाड़ी के धुॅंवा, करय हाल बेहाल । रूख राई मन हे कहां, जंगल हे बदहाल ।। -रमेश चौहान
टिप्पणियाँ
एक टिप्पणी भेजें