मनखे काबर करय दुख, भूला के बिसवास।
दुख के भीतर हवय सुख, इही जगत के आस ।।
इही जगत के आस, रिकोथे तेन समोथे ।
हमर कहां अवकात, सबो ओही पुरोथे ।।
घट घट जेखर वास, कोन ओला परखे ।
छोड़ संसो चिंता, करम भर कर मनखे।।
...........‘रमेश‘.................
तुलसी चौरा अंगना, पीपर तरिया पार । लहर लहर खेती करय, अइसन गांव हमार ।। गोबर खातू डार ले, खेती होही पोठ । लइका बच्चा मन घला, करही तोरे गोठ ।। गउचर परिया छोड़ दे, खड़े रहन दे पेड़ । चारा चरही ससन भर, गाय पठरू अउ भेड़ ।। गली खोर अउ अंगना, राखव लीप बहार । रहिही चंगा देह हा, होय नही बीमार ।। मोटर गाड़ी के धुॅंवा, करय हाल बेहाल । रूख राई मन हे कहां, जंगल हे बदहाल ।। -रमेश चौहान
टिप्पणियाँ
एक टिप्पणी भेजें