हे काम पूजा

तैं बात सुन्ना । अउ बने गुन्ना
जी भर कमाना । भर पेट खाना

ये पूट पूजा । ना करे दूजा
जीनगी जीबे । जब काम पीबे

बिन काम जोही । का तोर होही
हे पेट खाली । ना बजे ताली

ये एक बीता । हे रोज रीता
तैं भरे पाबे । जब तैं कमाबे

परिवार ठाढ़े । अउ बुता बाढ़े
ना हाथ पैसा । परिवार कैसा

जब जनम पाये । दूधे अघाये
जब गोड़ पाये । तब ददा लाये

खाई खजेना । तैं हाथ लेना
लइका कहाये । खेले भुलाये

ना कभू सोचे । कुछु बात खोचे
काखर भरोसा । पांचे परोसा

आये जवानी । धरके कहानी
अब काम खोजे । दिन रात रोजे

पर के सपेटा । खाये चपेटा
तैं तभे जाने । अउ बने माने

संसार होथे । दुख दरद बोथे
जब हाथ कामे । तब होय नामे

तैं बुता पाये । दुनिया बसाये
दिन रात फेरे । जांगर ल पेरे

ये पेट सेती । तैं करे खेती
प्रिवार पोसे । बिन भाग कोसे

बस बुता कामे । कर हाथ ताने
जब काम होथे । सब मया बोथे

बेरा पहागे । जांगर सिरागे
डोकरा खॉसे । छोकरा हॉसे