गणेश चालीसा

-दोहा- 

सबले पहिले होय ना, गणपति पूजा तोर । 
परथ हवं मैं पांव गा, विनती सुन ले मोर ।। 
जय गणपति गणराज जय, जय गौरी के लाल । 
बाधा मेटनहार तैं, हे प्रभु दीनदयाल ।। 

चौपाई

 हे गौरा-गौरी के लाला । हे प्रभू तैं दीन दयाला 

सबले पहिली तोला सुमरँव । तोरे गुण ला गा के झुमरँव 

तही बुद्धि के देवइया प्रभु । तही विघन के मेटइया प्रभु 

तोरे महिमा दुनिया गावय । तोरे जस ला वेद सुनावय 

देह रूप गुणगान बखानय । तोर पॉंव मा मुड़ी नवावय 

चार हाथ तो तोर सुहावय । हाथी जइसे मुड़ हा भावय 

मुड़े सूंड़ मा लड्डू खाथस । लइका मन ला खूबे भाथस 

सूपा जइसे कान हलावस । सबला तैं हा अपन बनावस 

चाकर माथा चंदन सोहय । एक दांत हा मन ला मोहय 

मुड़ी मुकुट के साज सजे हे । हीरा-मोती घात मजे हे 

भारी-भरकम पेट जनाथे । हाथ जोड़ सब देव मनाथे 

तोर जनम के कथा अचंभा ।अपन देह ले गढ़ जगदम्‍बा 

सुघर रूप अउ देके चोला । अपन शक्ति सब देवय तोला 

कहय दुवारी पहरा देबे । कोनो आवय डंडा लेबे 

गौरी तोरे हे महतारी । करत रहे जेखर रखवारी 

देवन आवय तोला जांचे । तोरे ले एको ना बाचे 

तोर संग सब हारत जावय । आखिर मा शिव शंकर आवय 

होवन लागे घोर लड़ाई । करय सबो झन तोर बड़ाई 

लइका मोरे ये ना जानय । तोरे बर त्रिसूल ल तानय 

तोर मुड़ी जब काटय शंकर । मॉं के जोगे क्रोध भयंकर 

देख क्रोध सब धरधर कांपे । शिव शंकर के नामे जापे 

उलट-पुलट सब सृष्टि करीहँव । कहय कालिका मुंड पहिरहँव 

गौरी गुस्‍सा शंकर जानय । तोला अपने लइका मानय 

हाथी मुड़ी जोड़ जीयावय । मात-पिता दूनो अपनावय 

नाम गजानन तोर धरावँय । पहिली पूजा देव बनावँय 

मात-पिता ला सृष्टि बताये । प्रदिक्षण तैं सात लगाये 

सरग ददा अउ धरती दाई ।तुहँर गोठ सबके मनभाई 

तोर नाम ले मुहरुत करथन । जीत खुशी ला ओली भरथन 

बने-बने सब कारज होथे । जम्‍मो बाधा मुड़धर रोथे 

जइसन लम्बा सूंड़ ह तोरे । लम्बा कर दव सोच ल मोरेे 

जइसन भारी पेट ह तोरे । गहरा कर दव बुद्धि ल मोरे 

गौरी दुलार भाथे तोला । ओइसने दव दुलार मोला 

गुरतुर लड्डू भाये तोला । गुरतुर भाखा दे दव मोला 

हे लंबोदर किरपा करदव । मोरे कुबुद्धि झट्टे हरदव 

मनखे ला मनखे मैं मानँव । जगत जीव ला एके जानँव 

नाश करव प्रभु मोर कुमति के । भाल भरव प्रभु बुद्धि सुमति के

अपने पुरखा अउ माटी के । नदिया-नरवा अउ घाटी के 

धुर्रा-चिखला मुड़ मा चुपरँव। देश-राज के मान म झुमरँव 

नारद-शारद जस बगरावय । मूरख ‘रमेश’ का कहि गावय हे 

रिद्धी सिद्धी के दाता । अब दुख मेटव भाग्य विधाता 

-दोहा- 

शरण परत गणराज के, मेटय सकल कलेश । 
सुख देवय पीरा हरय, गणपति मोर गणेश ।। 

जय जय गणराज प्रभु, रखव आस विश्‍वास ।

विनती करय 'रमेश' हा, कर लौ अपने दास ।।