दुवारी मा चौरा, चौरा म घर
चातर होगे साकुर, अब धंधा के मर । मोरे गाँव मा
मोरे गाँव मा, देखय कोन गाँव ला । मोरे गाँव मा
गली ला छेके, मन भर के
लइका खेले नई सकयं, अब बने तन के । मोरे गाँव मा
मोरे गाँव मा, देखय कोन गाँव ला । मोरे गाँव मा
खेत तीर परिया, परिया तीर खेत
खेत खेते हवय, परिया ला तो देख । मोरे गाँव मा
मोरे गाँव मा, देखय कोन गाँव ला । मोरे गाँव मा
नदिया के पीरा, सुनय अब कोन
नदिया के पैरी, काबर होगे मोन । मोरे गाँव मा
मोरे गाँव मा, देखय कोन गाँव ला । मोरे गाँव मा
बस्ती मा तरिया, तरिया मा बस्ती
लइका तउरय कहाँ, अब अपने मस्ती । मोरे गाँव मा
मोरे गाँव मा, देखय कोन गाँव ला । मोरे गाँव मा
गाय बर चरिया, चरिया बर गाय
कोठा होगे सुन्ना, बछरू नई नरियाय । मोरे गाँव मा
मोरे गाँव मा, देखय कोन गाँव ला । मोरे गाँव मा
-रमेश चौहान
टिप्पणियाँ
एक टिप्पणी भेजें