रमेश चौहान के छत्‍तीसगढ़ी कविता

 चुन्दी (कुण्‍डलियां) चुन्दी बगरे हे मुड़ी, जस कोनो फड़बाज। लम्बा-लम्बा ठाढ़ हे, जइसे के लठबाज ।। जइसे के लठबाज, तने हे ठाढ़े-ठाढ़े । कंघी के का काम, सरत हे माढ़े-माढ़े ।। मुसवा दे हे चान, खालहे ला जस बुन्दी । आज काल के बात, मुड़ी मा बगरे चुन्दी ।। -रमेश चौहान

 बिन काम-बुता हम तो मरबो  (दुर्मिल सवैया) चल रे चल गा चल ना चल जी, कुछु काम-बुता हम तो करबो । पढ़ आखर चार भला दुनिया, हम काम बिना कइसे तरबो । बइठे-बइठे मिलही कुछु का ? पइसा बिन इज्जत का भरबो । पढ़ई-लिखई सब फोकट हे, बिन काम-बुता हम तो मरबो ।। पढ़ई-लिखई जरूरी जग मा, पर हे बिरथा सब काम बिना । पढ़ के हम आखिर का करबो बिन काम-बुता अउ दाम बिना ।। कुछु काम न आवय रे हमला अइसे पढ़ई  तन जान बिना । अँखिया अब खोल निटोर बने, धन हे जब आखर ज्ञान बिना ।। -रमेश चौहान

 कोरोना के डंस, लॉकडाउन के चाबे (छप्‍पय छंद) ये कोरोना रोग, लॉकडाउन ला लाये । रोजी-रोटी काम, हाथ ले हमर नगाये ।। रोग बड़े के दोख, सबो कोती ले मरना । जीना हे जब पोठ, रोग ले अब का डरना ।। कोरोना के ये कहर, काम-बुता ला तो छिने । बिना रोग के रोग मा, मरत ला कोन हा गिने ।। गिनत हवय सरकार, दिखय जेने हा आँखी । गिनय कोन गा आज, झरे कतका के पाँखी ।। कोरोना के डंस, लॉकडाउन के चाबे । खाली होगे हाथ, गीत काखर तैं गाबे ।। बिन पइसा के जिंनगी, मछरी तरिया पार के । जीना-मरना एक हे, पइसा बिन परिवार के । देवय कोने काम, काम चाही जी हम ला । काम नहींं ना दाम, कोन देखावय दम ला । अटके आधा सॉस, लॉकडान के मारे गा । डोंगा हे मझधार, कोन हम ला अब तारे गा ।। कोरोना के फेर मा, हमर लुटा गे नौकरी । काम चलाये बर हमर, बेचागे सब बोकरी ।।

 कुण्‍डलियां तरिया भीतर तउरथे, जिंदा मछरी लाख । चार मरे मछरी लखत, डोलय काबर साख ।। डोलय काबर साख, देख बिगड़े ओ चारे । बिगड़े रद्दा रेंग, जेन रहिथे सब ला मारे । मनखे कई हजार, नई हे मन के करिया । जेखर बल परताप, टिके हे धरती तरिया ।। -रमेश चौहान

 नीति के दोहा धरम करम के सार हे, जिये मरे के नेंग । जीयत भर करले करम, नेकी रद्दा रेंग ।। करम तोर पहिचान हे, करम तोर अभिमान । जइसे करबे तैं करम, तइसे पाबे मान ।। करे बुराई आन के, अपनो अवगुण देख । धर्म जाति के आदमी, गलती अपने सरेख ।। पथरा लकड़ी चेंदरा, अउ पोथी गुरू नाम । आस्था के सब बिम्ब हे, माने से हे काम ।। आस्था टोरे आन के, डफली अपन बजाय । तोरो तो कुछु हे कमी, ओला कोन बताय ।। मनखे ला माने कहाँ, मनखे मनखे एक । ऊँच-नीच घिनहा बने, सोच धरे हस टेक ।। बदला ले के भाव ले, ओखी जाथे बाढ़ । भुले-बिसरे भूल के, ओखी झन तैं काढ़  ।। -रमेश चौहान

दू-चारठन मुक्‍तक -नवा जनरेशन 1. लइका कुछ बात मानय नहीं (बहर-212 212 212) लइका कुछ बात मानय नहीं काम कुछु वो ह जानय नहीं मैं ददा का करॅंव सोच के कुछु करे बर कभू ठानय नहीं 2.तोर पूछी टेड़गा हे, मोर हा तो सोझ हे (बहर-2122 2122 21222 212) तोर पूछी टेड़गा हे, मोर हा तो सोझ हे गोठ गुरतुर मोर हे, तोर हा नुनझुर डोझ हे ये उखेनी आय तोरे, बात ला अब समझ सोच येही हा हमर बर, आज भारी बोझ हे 3.. संस्कृति हा नवा जनरेशन म मरगे टूरा मन नशा के टेशन म मरगे टूरी मन नवा के फेशन म मरगे काला का कही रे अपने ह बैरी संस्कृति हा नवा जनरेशन म मरगे

छत्तीसगढ़ स्थापना दिवस  माटी के संस्कार मा,सबला होवय नाज ।। हमर राज छत्तीसगढ़,  दिवस स्थापना आज । दिवस स्थापना आज,  बधाई गाड़ा-गाड़ा । बने रहय संस्कार, जेखरे ये हा माड़ा ।। अपने बोली बोल, धरव अपने परिपाटी । तोरे ये संस्कार, तोर आवय ये माटी ।। -रमेश चौहान

 गजल बहर 2122 2122 2122 2122 काम चाही काम चाही काम चाही आदमी ला काम करके हाथ मा तो दाम आही आदमी ला काम ले तो आदमी के मान अउ सम्मान हे जेब खाली होय संगी कोन भाही आदमी ला कोढ़िया ला कोन भाथे कोन खाथे रोज गारी दाम मिलही जब नता मा तब सुहाही आदमी ला लोभ नो हय मोह नो हय काम जरूरी हे जिये बर  साँस बर जइसे हवा हे ये जियाही आदमी ला छोड़ फोकट के धरे के लोभ अपने काम मांगव लोभ फोकट के धरे मा लोभ खाही आदमी ला काम दे दौं काम दे दौं भीख झन दौं थोरको गा ये बुता हर पोठहर मनखे बनाही आदमी ला सिख हुनर तैं काम के गा तब न पाबे काम तैं हा लाख पोथी ले बने ये काम लाही आदमी ला -रमेश चौहान

सार छंद कोरोना के कहर देख के, डर हमला लागे । गाँव-गाँव अउ शहर-शहर मा, कोराना हा छागे ।। सब ला एके दिन मरना हे, नहीं मरब ले डर गा । फेर मरे के पाछू मरना, मन काँपे थर-थर गा काठी-माटी हा बिगड़त हे, कोनो तीर न जावय । पिण्डा-पानी के का कहिबे, कपाल क्रिया न पावय ।। धरम-करम हे जियत-मरत के, काला कोन बतावय । अब अंतिम संस्कार करे के,  कइसे धरम निभावय ।। कभू-कभू तो गुस्सा आथे, शंका मन उपजाथे । बीमारी के करे बहाना, बैरी हा डरूवाथे ।। बीमरहा हे जे पहिली ले, ओही हर तो जाथे । बने पोठलगहा मनखे मन, येला मार भगाथे । हमरे संस्कार रहय जींदा, मरे म घला सुहाथे ।। -रमेश चैहान

दुवारी मा चौरा, चौरा म घर चातर होगे साकुर, अब धंधा के मर । मोरे गाँव मा मोरे गाँव मा, देखय कोन गाँव ला । मोरे गाँव मा गली ला छेके, मन भर के लइका खेले नई सकयं, अब बने तन के । मोरे गाँव मा मोरे गाँव मा, देखय कोन गाँव ला । मोरे गाँव मा खेत तीर परिया, परिया तीर खेत खेत खेते हवय, परिया ला तो देख । मोरे गाँव मा मोरे गाँव मा, देखय कोन गाँव ला । मोरे गाँव मा नदिया के पीरा, सुनय अब कोन नदिया के पैरी, काबर होगे मोन । मोरे गाँव मा मोरे गाँव मा, देखय कोन गाँव ला । मोरे गाँव मा बस्ती मा तरिया, तरिया मा बस्ती लइका तउरय कहाँ, अब अपने मस्ती । मोरे गाँव मा मोरे गाँव मा, देखय कोन गाँव ला । मोरे गाँव मा गाय बर चरिया, चरिया बर गाय कोठा होगे सुन्ना, बछरू नई नरियाय । मोरे गाँव मा मोरे गाँव मा, देखय कोन गाँव ला । मोरे गाँव मा -रमेश चौहान