छत्तीसगढ़ी श्लोक (अनुष्टुप छंद)

1.
दुनिया ला बनाये तैं, कहाये भगवान गा ।
दुनिया ला चलाये तैं, मनखे बदनाम गा ।।
2.
पत्ता डोलय ना एको, मरजी बिन तोर तो ।
अपन मन के धुर्रा, उड़ावय न थोरको ।।
3.
तहीं हवस काया के, सब मा एक प्राण गा ।
तहीं हवस माया के, अकेल्ला सुजान गा ।।
4.
सबकुछ ह तो तोरे, हमर एक तो तहीं ।
तैं पतंग के डोरी, हम पतंग के सहीं ।।
5.
सब मा तोर माया हे, तोला जउन भात हे ।
कहां हमर ये बेरा, कुछु अवकात हे ।।
6.
मनखे मनखे माने, मनखे मनखे सबो ।
मनखेपन के देदे, प्रभु तैं वरदान गो ।।