कभू आय कभू तो जाय, सुख बादर जेन कहाये।
सदा रहय नहीं गा साथ, दुख जतका घाम जनाये ।।
बने हवय इहां दिन रात, संघरा कहां टिक पाये ।
बड़े होय भले ओ रात, दिन पक्का फेर सुहाये ।।
तुलसी चौरा अंगना, पीपर तरिया पार । लहर लहर खेती करय, अइसन गांव हमार ।। गोबर खातू डार ले, खेती होही पोठ । लइका बच्चा मन घला, करही तोरे गोठ ।। गउचर परिया छोड़ दे, खड़े रहन दे पेड़ । चारा चरही ससन भर, गाय पठरू अउ भेड़ ।। गली खोर अउ अंगना, राखव लीप बहार । रहिही चंगा देह हा, होय नही बीमार ।। मोटर गाड़ी के धुॅंवा, करय हाल बेहाल । रूख राई मन हे कहां, जंगल हे बदहाल ।। -रमेश चौहान
टिप्पणियाँ
एक टिप्पणी भेजें