रमेश चौहान के छत्‍तीसगढ़ी कविता

छत्तीसगढ़ दाई धरे, अचरा अपन संस्कार गा। मनखे इहां के हे दयालू, करथे मया सत्कार गा । दिखथे भले सब कंगला, धनवान दिल के झार गा । पहिचान हे ये तो हमर, रखना हवे सम्हार गा ।।

कइसे काटव मैं भला, अम्मावस के रात । आंखी बैरी हा कहय, कब होही परभात ।। कतका जुगनू चांदनी, चमकत करे उजास । कुलुप अंधियारी लगय, चंदा बिना अगास ।। सुरता के ओ धुंधरा, बादर बनके छाय । आंखी ले पानी झरे, सावन झड़ी लगाय ।। पैरी बाजय गोड़ के, गरज घुमर के घोर । चम चम बिजली कस करे, माथे बिंदी मोर ।। गरू लगय अपने बदन, गहना ले धंधाय । धनी अगोरा तोर हे, मोरे मन चिल्लाय ।। -रमेश चौहान

चलव जयंती मनाबो, गुरू घासी दास के गुरू घासी दास के संगी गुरू घासी दास के घर कुरिया लिप पोत के, खोर अंगना सजाबो जैतखाम मा सादा झंड़ा, फेरे नवा चढाबो अउ चैका हम कराबो, गुरू घासी दास के गुरू घासी दास के संगी गुरू घासी दास के सादा सादा ओढ़ना पहिरे, सादगी ला बगराबो छांझ मांदर हाथ धरे, गुरू के जस ला गाबो अउ पंथी नाच देखाबो, गुरू घासी दास के गुरू घासी दास के संगी गुरू घासी दास के गुरू संदेशा मन मा धरे, सत के अलख जगाबो सत के रद्दा रद्दा रेंग रेंग, सतलोक मा जाबो सतनाम धजा फहराबो, गुरू घासी दास के गुरू घासी दास के ओ संगी गुरू घासी दास के

शिरड़ी के सांई कहय, सबके मालिक एक । जात धरम काहीं रहय, मनखे होवय नेक ।। सांई दीनानाथ हे, सच्चा संत फकीर । मनखे के सेवा करय, मेटे सबो लकीर ।। अइसन दीनानाथ के, करलव जी अभिशेक । शिरड़ी के सांई कहय...... मनखे के संतान हे, हिन्दू अउ इस्लाम । मनखे के अल्ला खुदा, मनखे के हे राम ।। काबर कोनो फेर तो, डगर खड़े हे छेक । शिरड़ी के सांई कहय.... मनखे के पीरा हरय, सबके सांई नाथ। भूख बिमारी मेट के, सबला करय सनाथ ।। मानव ओखर बात ला, अपने माथा टेक । शिरड़ी के सांई कहय....

हे गुरू घासीदास, शक्ति हमला दे अतका । छोर सकी सब गांठ़, परे हे मन मा जतका ।। हे गुरू घासीदास, शक्ति हमला दे अतका । छोर सकी सब गांठ़, परे हे मन मा जतका ।। बैरी हे मन मोर, बइठ माथा भरमाथे । डगर झूठ के छांट, हाथ धर के रेंगाथे ।। अइसन करव उपाय, छूट जय ऐखर झटका । हे गुरू घासीदास, शक्ति हमला दे अतका ।। सत के रद्दा तोर, परे जस पटपर भुइया । कइसे रेंगंव एक, दिखे ना एको गुइया ।। परे असत के फेर, खात हन हम तो भटका । हे गुरू घासीदास, शक्ति हमला दे अतका ।। मन मंदिर मा तोर, एक मूरत दे अइसन । जिहां बसे हे झार, असत मन हा तो कइसन ।। मर जावय सब झूठ, पाय मूरत के रचका । हे गुरू घासीदास, शक्ति हमला दे अतका ।।

गांव बसे हमरे दिल मा हम तो लइका अन एखर संगी । गांवन मा सबके ममता मिलथे कुछु बात म होय न तंगी ।। जोतत नागर खेत किसान धरे मुठिया कहिथे त तता जी । खार अऊ परिया बरदी म चरे गरूवा दिखथे बढि़या जी ।।

हर बात के गलती दिखे, जनतंत्र मा सरकार के । अधिकार ला सब जानथे,  अउ मांगथे ललकार के ।। कर्तव्य ला जनता कभू, अपने कहां कब मानथे । हर काम हा सरकार के, अइसे सबो झन जानथे ।। -रमेश चौहान

जय होय भारत देश के, जनमे जिहां भगवान हे । धरती ह पावन हे जिहां, मनखे घलो ह महान हे ।। नदियां हवे कतका इहां, नरवा घला मन शान हे । पथरा  घला हमला लगे, जइसे बने भगवान हे ।

अपने सही समझे कभू, मनखे बने मनखे सही । अपने च मा कतका रमे, सबला भुलाय रखे तही ।। चिरई घलो करथे बने, अपने च खातिर काम गा । करले कुछु मनखे सही, मनखे हमी मन आन गा ।।

जय बोलव सतनाम के, जय जय जय सतनाम । जय हो घासीदास के, जय जय जय जतखाम ।। सतगुरू अउ सतनाम के, करथे जेने जाप । छूट जथे हर बात के, ओखर तो संताप ।। बाबा के सत मा बनय, बिगड़े तोरे काम । जय बोलव सतनाम के... जीवन मा भर सादगी, झूठ लबारी छोड । लोभ मोह के बंधना, तिनका जइसे तोड़ ।। बाबा के आदेश ला, धर के आठो याम । जय बोलव सतनाम के... केवल पूजा पाठ ले, होय नही उद़धार । सत के रद्दा रेंग के, अपने करम सुधार ।। एक करम तो सार हे, करत रहव सत काम । जय बोलव सतनाम के...

गज़लबानी तुकबंदी गहूँ संग कीरा रमजाजथे  गहूँ संग कीरा रमजाजथे । दूध मा पानी बेचाजथे । संगत के अइसन असर नून मा मिरचा खवाजथे । रेंगत रेंगत नेता संग चम्मच हा नेता कहाजथे । बइठे बइठे जुवा मेरा खेत खार बेचाजथे । धनिया लेना कोन जरूरी छुये मा हाथ ममहाजथे । गुलाब फूल टोरत टोरत काटा मा हाथ छेदाजथे । मया कहूं होय निरमल दिल दिल मा समाजथे । बड़े संग मिले बिरोपान छोटे संग नाक कटाजथे । तैं जान तोर काम जाने गोठ गोठ मा गोठ आजथे ।

चल रावण ला मारबो, खोज खोज के आज । बाच जथे हर साल ओ, आवत हमला लाज ।। पुतला मा होतीस ता, रावण बर जातीस । घेरी घेरी हर बरस, फेर नई आतीस ।। बइठे हे ओ हर कहां, अपन सजाये साज । चल रावण ला मारबो.... कहां कहां हम खोजबो, का ओखर पहिचान । कोन बताही गा भला, कहां छुपाये जान ।। दस मुड़ दस अवगुण हवय, हवय अलग अंदाज । चल रावण ला मारबो... मरे राम के बाण ले, पाय राम ले सीख । जीव जीव मा वास कर, कोनो ला झन दीख ।। तोर मोर घट मा बसे, करत हवे ओ राज । चल रावण ला मारबो... दिखय नही अंतस अपन, हम करि कोन उपाय । पुतला ला अउ मारबो, ओही हमला भाय ।। आवन दे गा हर बरस, बेच खाय हे लाज । चल रावण ला मारबो...

चोर चोर ओ चोर हे, परत हवे गोहार । वाटसाप अउ फेसबुक, ओखर हवे शिकार ।। एक डाड लिख ना सकय, कवि कहाय के साध । पढ़े लिखे वो चोर हा, करत हवे अपराध ।। शारद के परसाद के, करे ओ तिरस्कार । चोर चोर ओ चोर हे... सब अइसन ओ चोर ला, देवव दंड कठोर । खडे रहय बजार मा, ओ हर दांत निपोर ।। संगत ओखर छोड़ दव, मुख ला दै ओ टार । चोर चोर ओ चोर हे.. अतको मा मानय नही, कोरट रद्दा भेज । आखर के दुश्मन हवय, कइसे करि परहेज ।। नो हय हासे के बुता, लेवव काम सवार । चोर चोर ओ चोर हे....

होगे मोरे जीनगी, कइसन ऊंच पहाड़ । सकला गे सब मास हा, बाचे केवल हाड़ ।। हाथ गोड़ होगे सगा, मोला तो बिसराय । मोरे आंखी मोर ले, आंखी अब चोराय ।। मन बैरी मानय नहीं, खड़े हवे जस ताड़ । होगे मोरे जीनगी... कुरिया खटिया टूटहा, रचे मोर संसार । भड़वा बरतन फूटहा, करिया करिया झार ।। मोर रंग मा रंग के, होगे सबो कबाड़ । होगे मोरे जीनगी.... नवा नवा समान हवे, जुन्ना के का काम । डारे जेला कोनहा, बेटा बहू तमाम ।। दोष कहां कुछु कोखरो, करथे सबो जुगाड । होगे मोरे जीनगी.. आंखी आंखी घूमथे, जुन्ना दिन हा मोर । रूप रंग के मोर तो, होवय कतका शोर ।। मोला देखे काम मा, समा जवय जब जाड़ । होगे मोरे जीनगी.. -रमेश चौहान

बेटा- बासी दे के भात दे, दे दाई कुछु खाय । सांय सांय जी हा करय, कुछु ना तो भाय ।। दाई-  दाना दाना खोज के, लेहूं भात बनाय । बेटा थोकिन सांस ले, बासी घला सिराय ।। बेटा- ठोमा ठोमा मांग के, ठोमा ना पाऐंव । गे रहेंव आंसू धरे, आंसू धर आऐंव ।। दाई- पानी हे आंसू हमर, पथरा हे भगवान । निरधन के तैं छोकरा, का तोरे हे मान ।। बेटा- भूख प्यास जानय नही, काबर अइसन बात । भर जातीस पेट हमर, दुच्छा देखत जात ।। दाई- गरीबहा बन पाप ला, भोगे भर आयेंन । भूख प्यास के मार ला, खूबे हम खायेंन ।। -रमेश चौहान

मैं विनय करंव कर जोर ओ, मोर मरकी माता, जस गावंव तोर मोर शितला ओ माता, जस गावंव तोर मोर गांव हरदी बजार के, लीम तरी तोरे डेरा बइगा बबा संग पुजारी, करत जिहां हे बसेरा संग मा सेवा बजावंव ओ, सरधा के छलके आंसू ले, तोरे पांव पखारंव अपन मन के सबो मनौती, तोरे चरण मढावंव फेर नरियर जस तन चढावंव ओ.... लइका बच्चा नर नारी सब, तोरे दुवारी आवंय अपन अपन हाथ जोर के, अपन दरद सुनावंय तोर दया ले सबो सुख पावंय ओ...

जतन करव बेटी के संगी जतन करव रे जतन करव नोनी के संगी जतन करव रे मोर जतन करव रे ओ.. मोर जतन करव रे मैं नारी दुखयारी अंव नर नारी के जननी महतारी अंव महतारी अंव जतन करव रे...... पेट भीतर काबर कोनो नोनी बाबू जांचे नोनी नोनी ला मारे तैं बाबू बाबू हा बाचे तुहर करेजा बाबू के मैं हर सुवारी अंव जतन करव रे...... आधा दुनिया मोरो हे आधा अबादी कहाय पेट भीतर हमला मार के सृश्टि रचना डोलाय जगत रचना के मैं हर फूलवारी अंव जतन करव रे...... जनम दे के दुनिया मा मोला बेटा कस बढ़ावा दाई ददा के लाठी बनहू महूं ला खूब पढ़ावा ससुरे मइके मा सुख दुख के संगवारी अंव जतन करव रे......

लहर लहर सादा झण्ड़ा हा, जैत खाम मा लहराय । हवे सत्य शाश्वत दुनिया मा, दे संदेशा जग बगराय ।। महानदी के पावन तट मा, गिरौदपुरी घाते सुहाय । जिहां बसे महंगु अमरौतिन, सुख मा जीवन अपन बिताय । सतरा सौ छप्पन के बेरा, अठ्ठारा दिसम्बरे भाय। निरधन महंगु के कुरिया मा, सत हा मनखे तन धर आय । चारो कोती मंगल होवय, लोगन मांदर ढोल बजाय । चिरई चिरगुन सब जंगल के, फूदक फूदक खुशी मनाय ।। लइका के मुॅह देख देख के, अपने सुध-बुध सब बिसरत जाय जेने देखय तेने जानय,  मुॅह मा कुछु बोली ना आय । अमरौतिन दाई के कोरा, बालक मंद मंद मुस्काय । ऐही लइका आघू चल के, गुरूजी घासी दास कहाय ।। सोनाखान तीर जंगल मा, घासी हा सत खोजय जाय । खोजत खोजत फेर एक दिन, छाता परवत ऊपर आय।। जिहां बबा बइठे जब आसन, घाते के समाधी लगाय । सत के संग मिले सत हा जब, सत सत सब एके हो जाय ।। सत के जयकारा फेर गुंजे, दुनिया मा सतनाम कहाय । मनखे मनखे सब एक कहे, सात बचन गुरू देत बताय । सत्य धरव सब अंतस भीतर, मारव मत कोनो जीव । मांस मटन खावव मत कोनो, जीव जीव हा होथे सीव ।। चोरी हारी ले दूर रहव, छोड़ जुआ चित्ती के खेल । नशा नाश क

 । कज्जल छंद । बोल सत्य नाम साहेब । सत्य सत्य नाम साहेब देख सत्य नाम साहेब । सत्य सत्य नाम साहेब । दोहा । चलव चलव गुरू के शरण, छोड़ अपन सब एब । एक बार जुरमिल कहव, सत्य नाम साहेब ।।  ।। चौपाई ।। सत के रद्दा, अगम गहिर हे । अगम गहिर हे.. चलय डगर, जेने फकीर हे ।। जेने फकीर हे... पटपर भुंइया, मन भरमावय । मन भरमावय साहेब मन भरमावय. गुरू बिन कोने, पार लगावय । पार लगावय साहेब पार लगावय. । दोहा । जीवन के सब भार ला, गुरू चरणे मा देब । हाथ जोड़ के बोलबो, सत्य नाम साहेब ।।  ।। चौपाई ।। तोर चरण मा, माथ नवाय हन । माथ नवाय हन. तोर दया ले, सब सुख पाये हन । सब सुख पाये हन. मनखे मनखे, एक बताये । एक बताये साहेब एक बताये. रंग खून के, एक दिखाये । एक दिखाये साहेब एक दिखाये । दोहा । घट घट मा भगवान हे, दरस परस कर लेब । कण-कण मा तैं देख ले, सत्य नाम साहेब ।। ।। चौपाई ।। पथ भटके ला, पथ देखाये । पथ देखाये.. जीव जीव ला, एक बताये । एक बताये ... सत के सादा, धजा बनाये । धजा बनाये साहेब धजा बनाये जैत खाम मा, तैं फहराये ।। तैं फहराये साहेब

माने मा पथरा घला, बन जाथे भगवान । श्रद्धा अउ विश्वास बिन, ईश्वर हे पाषान ।। दाई के हर ठांव मा, बाजे मांदर ढोल । एक बार मां बोल ले, अपन करेजा खोल ।। मनखे मनखे एक हे, ईश्वर के सब पूत । ऊॅंच नीच मत मान तै, मान मत छुवा छूत ।। बिना गोड़ के रेंगथें, सुन लेथे बिन कान । काम करय बिन हाथ के, बोलय बिना जुबान ।। लकलक लकलक हे करत, परम दिव्य ओ रूप । खप्पर हे अंगार कस, जग जननी भव भूप ।। गाड़ा-गाड़ा जोहार हे, हे जग जननी तोर । तोरे दर मा आय हन, बिनती सुन ले मोर ।। नाश करे बर पाप के, मां काली बन आय । अइसन दाई देख के, लइका सब डरराय ।

"अपन अभिव्यक्ति के सुघ्घर मंच"

"अपन अभिव्यक्ति के सुघ्घर मंच"

मां आदि शक्ति के नवरात पर्व के अवसर मा मोर रचित देवी गीत मन ला भाई प्रेम पटेल, बिलासपुर हा अपन स्वर मा ढाले हे, छत्तीसगढी के छंद के रचना ला शास्त्रीय गायन के प्रयास आप सब ला समर्पित हे https://drive.google.com/folderview?id=0B_vVk5gISWv3Rk9DNEFPdGtiUXM&usp=sharing

दुनिया मा तैं आय के, माया मा लपटाय । असल व्यपारी हे कहां, नकली के भरमार । कोनो पूछय ना असल, जग के खरीददार ।। असल खजाना छोड़ के, नकली ला तैं भाय ।। दुनिया मा तैं आय के..... का राखे हे देह के, माटी चोला जान । जाना चोला छोड़ के, झन कर गरब गुमान ।। मोर मोर तैं तो कहे, अपने गाना गाय ।। दुनिया मा तैं आय के..... कागज के डोंगा बनक, बने देह हा तोर । नदिया के मजधार मा, देही तोला बोर ।। माया रतिया सोय के, सपना मा हरशाय ।। दुनिया मा तैं आय के..... परे विपत मा देख ले, आथे कोने काम ।। छोड़ जगत के आस ला, भज ले सीताराम । मनखे तन ला पाय के, बिरथा झन गंवाय ।। दुनिया मा तैं आय के.....

जुरमिल संगी चलव सब, गढ़बो अपने देश । मनखे हा मनखे रहय, कइसनो होवय वेश ।। देश भक्ति के राग मा, देवत अपने ताल । भारत माता एक हे, हम सब ओखर लाल ।। जाति धरम के रूंधना, टोर-टार के लेश । जुरमिल संगी चलव सब.... हर मंदिर के षंख हा, करय एक जयकार । मस्जिद के अजान घला, करय खूब गोहार । जय जय मइया भारती, जय जय भारत देश । जुरमिल संगी चलव सब.... भात मिलय हर पेट ला, सबो हाथ ला काम । निरधन अउ बनिहार ला, मिलय बरोबर दाम ।। मिलजुल रद्दा खोजबो, झन जावव परदेश । जुरमिल संगी चलव सब... षासन चारा छोड़ के, नेता फांदा टोर । हाथ हाथ सब जोर के, करत नवा अंजोर ।। अपने झगरा मेटबो,  मेटत सबो कलेश । जुरमिल संगी चलव सब

दाई दाई शक्ति ओ, भगतन करत पुकार । तोरे हमला आसरा, करव हमर उद्धार ।। चांदावन के पार मां, आदि शक्ति के ठांव । भक्त शक्ति दाई कहय, शीतल जेखर छांव ।। जेन दरद ला मेटथे, सुने भगत गोहार । दाई दाई शक्ति ओ.... हवय नवागढ़ खार अउ, मुरता गांवे बीच । महिमा ला बगराय के, भगतन लेवत खीच । लगे रेम हे भक्त के, धरे मनौती झार । दाई दाई शक्ति ओ..... जगमग जगमग जोत करय, जब आये नवरात । ढोलक मादर थाप ले, तोरे जस सब गात ।। नौ दिन अउ नव रात ले, करत तोर जयकार । दाई दाई शक्ति ओ.... दाई सुन के तोर जस, मांगे भगत मुराद । कोनो दौलत मांगते, कोनो मुख संवाद । कोनो मांगे नौकरी, कोनो लइका प्यार । दाई दाई शक्ति ओ... सबके पोछे आसु तैं, अपन गोद बइठाय । हॅसत गात तब तो भगत, अपने द्वारे जाय । जय हो दाई षक्ति के, करत सबो जयकार । दाई दाई शक्ति ओ...

नायक सरर-सरर डोलत हवय, तोर ओढ़नी छोर । संग केष मुॅह ढाक के, रूप निखारे तोर ।। नायिका झुलुप उड़े जब तोर गा, मन हरियावय मोर । चमक सुरूज कस हे दिखय, मुखड़ा के तो तोर ।। नायक गरहन लागय ना तोर मुॅह, चकचक ले अंजोर । चंदा कामा पूरही, अइसन मुखड़ा तोर । नायिका गज भर छाती तोर हे, लंबा लंबा बाह । झूला झूलत मैं कभू,  कहां पायेंव थाह ।। नायक कारी चुन्दी के घटा, छाये हे घनघोर । भीतर  मैं धंधाय हॅव, निकलव कोने कोर ।।   नायिका बोली तोरे मोहनी, राखे मोला घोर । जांव भला मैं कोन विधि, संगे तोरे छोर । नायक छोड़ जगत के बंधना, बांध मया के गांठ । जनम जनम के मेल कर, खाई ला दी पाट ।। नायिका हवे अगोरा रे धनी, कब लाबे बारात । आके तोरे अंगना, करॅव मया बरसात ।।

मोरे तैं मन मोहनी, आंखी पुतरी मोर। मोरे तैं दिल जोंगनी, मोरे तैं अंजोर ।। सुघ्घर सपना मोर तैं, आंखी काजर मोर । धड़कन दिल के तैं हवस, मोहन कस चित चोर ।। धरे करेजा हाथ मा, जोहत रद्दा तोर । धक धक मोरे दिल करय, सुन पैरी के शोर ।। छुईमुई बानी हवय, धनी चेहरा मोर । देखे के मन लालषा, तोपॅव अचरा छोर ।। लकड़ी मा आगी बरे, आगी जभे लगाय । जोत मया के हे जले, जब हम नजर मिलाय ।। अंखियन के बात हा, सिरतुन गजब सुहाय । नजर परे जब नजर ले, बैरी कोन हटाय ।। बैरी कोनो ना जगत, बैरी तहीं कहाय । लुका-लुका तैं देखथस, जियरा मोर जलाय ।। लोकलाज का जानबे, टूरा बन तैं आय । गहना मोरे लाज के, तोही ला तो भाय ।।

जय जय मइया आदि भवानी । जय जय मइया जग कल्याणी तोरे भगतन सेवा गावय । आनी बानी रूप सजावय सोलह सिंगार तोर माता । परम दिव्य हे जग विख्याता मनखे भगती अपन देखावय । सुघर रूप ला अउ सुघरावय पांव महुर दे पैजन बांधे । चुटकी बिछिया संगे सांधे कनिहा मा करधन पहिरावय। करधन घुंघरू बाज बजावय ककनी बहुटा हाथ सजाये । लाल चुरी संगे पहिराये लाली लुगरा अउ लाल चुनर । सुतिया पहिरावय माॅं के गर कानन कुण्डल नथली नाके । गाल इत्र चंदन ले ढाके मांघे मोती बिन्दी माथे । फूलन गजरा चुन्दी गाथे । सब सिंगार मा विष्वास भरे । भगतन श्रद्धा ले भेट करे मइया स्वीकार करव सेवा । भगती के दव हमला मेवा

लाल बहादुर लाल हे, हमर देष के शान । सीधा-सादा सादगी, जेखर हे पहिचान ।। सैनिक मन के हौसला, जेन बढ़ाये घात । भुईया के भगवान के, करे पोठ जे बात ।। दे नारा जय जवान अउ, जय हो हमर किसान । लाल बहादुर लाल हे.... निर्धनता ला जेन हा, माने ना अभिशाप । मुखिया होके देश के, छोड़े अपने छाप ।। राज धरम के जेन हा, करे खूब सम्मान । लाल बहादुर लाल हे.... खास आम सब ले कहे, मात्र एक संदेश । करव कर्तव्य सब अपन, आवय सबके देश ।। तुहर भरोसा देश हे, जेखर तुहीं मितान । लाल बहादुर लाल हे...

धर गांधी के बात ला, अपने अचरा छोर । सत्य अहिंसा के डहर, रेंगव कोरे कोर ।। दिखय चकाचक गांव हा, अइसे कर तैं काम । दूर करव सब गंदगी, होवय जउन तमाम ।। साफ सफाई होय ना, तन-मन के गा तोर । धर गांधी के बात ला.... मार काट ला छोड़ के, जोत शांति के बार । पर धन नारी देख के, कर झन अत्याचार ।। अपन आचरण कर सुघर, झन तैं दांत निपोर । धर गांधी के बात ला.... गलती दूसर के दिखय, भीतर देखे कोन । मन के दरपन हाथ मा, काबर बइठे मोन ।। सच हा सच होथे सदा, रखे जेन झकझोर । धर गांधी के बात ला... महावरी के पाठ हे, ईसु बढ़ाये मान । बाबा घासी दास हा, करे हवे फरमान ।। राम रहिम के देश मा, सच ईश्वर हे तोर । धर गांधी के बात ला.....

जय मां भवानी आदि माता, तैं जगत के रचइया । सब जीव अउ, निरजीव के, मइया तहीं, हस बसइया ।। कण-कण रचे, जन-मन बसे, तोरे मया, परकाश्‍ा ओ । तोरे दुवारी हम खड़े, हन धर हृदय, विश्‍वास ओ । करथस मया सब बर बराबर, मान तैं संतान ओ । अवगुण धरे ना तैं हमर, नादान हमला जान ओ ।। सद्बुद्धि अउ सुविचार के, तैं बाटथस परसाद ओ । झोली खुश्‍ाी भर के हमर, तैं मेटथस अवसाद ओ ।। गोहार सुन अपने भगत के, श्‍ोर मा चढ़ आय ओ । बनके कभू दुर्गा कभू काली, भगत हष्र्‍ााय ओ ।। मारे धरा के सब दुष्‍ट ला, सद्पुण्य ला बिलगाय ओ । राखे धरम के लाज ला, अपने धजा लहराय ओ ।

हे मइया महिमा तुहरे जग चार जुगे त्रिय काल समाये । वो तइहा अउ आज घला सब भक्त मिले तुहरे जस गाये । पार न पावय देवन सृष्टि म नेति कहे सब माथ नवाये । ये मनखे कइसे तुइरे जस फेर भला कुछु बात बताये ।। कोन रचे जग सृष्टिन सुंदर, लालन पालन कोन करे हे । कोन इहां उपजावय जीवन, काल धुरी भुज कोन धरे हे ।। जेखर ले उपजे विधि शंकर, जेन रमापति ला उपजाये । आदि अनंत न जेखर जानन, शक्ति उही हर काय कहाये ।। शैल सुता ह रचे जग सुंदर, लालन पालन गौरि करे हे । आदि उमा उपजावय जीवन, काल धुरी भुज कालि धरे हे ।। आदिच शक्ति ह तो विधि शंकर राम रमापति ला उपजाये । आदि अनंत पता नइ जेखर, शक्ति उही हर मातु कहाये ।। -रमेश चौहान मिश्रापारा, नवागढ जिला-बेमेतरा

जगमग जगमग जोत करत हे, मंदिर मंदिर देवी ठांव । जंगल भीतर पर्वत ऊपर, शहर-शहर अउ जम्मो गांव ।। माता के जयकारा गूंजे, जब छाये जग मा नवरात । धरती नाचे बादर झूमे, रूख राई घाते इतरात ।। लहर लहर जब करे जवारा, सबो देवता माथ नवात । परम शांति अउ सुख ला पावय, जेने ऐखर दरशन पात । अइसन बेरा भगत जान के, मइया के ते द्वारे जात । अपने मन के सबो मनौती, मइया ले सबो गोहरात।। नाना भगतन मइया के हे, नाना रूप अपन देखाय । धरे ढोल मादर कतको मन, दिव्य कथा तोरे तो गाय । बरन बरन के बाजा बाजे, बरन बरन के राग सुनाय ।। कोनो जिभिया बाना छेदे, कोनो छाती जोत मढ़ाय ।। कोनो सुन जस तोरे झूमे, सांटे मांगे हाथ लमाय । झूपत झूपत भगतन नाचे, सुध बुध ला अपने बिसराय ।। श्रद्धा अउ विश्वास धरे सब, मइया मइया करे पुकार । सबो मनौती सबके मइया, पूरा कर करदव उपकार ।। कोरा के हम तोरे लइका, तैं हमरे जग जननी माय । मानवता पथ छोड़ी झन हम, हमला माता लेहु बचाय ।।

हे जग कल्याणी, आदि भवानी, माता रानी, दाई ओ । दुष्टन ला मारे, संतन तारे, भगत उबारे, दाई ओ। जुग जुग ले छाहित, हवस समाहित, श्रद्धा भगती -मा दाई ।। मां तोरे ममता, सब बर समता, जीव जंतु मा, हे छाई ।। आये नवराते, भगतन माते, दिन राते तो, सेवत हे । नौ दिन नौ रूपे, भगतन झूपे, साट हाथ मा, लेवत हे । जय जय मां काली, शेरावाली, खप्पर धारी, दाई ओ । तहीं दंतेश्वरी, बम्मलेश्वरी, चंद्रहासनी, अउ तहीं महा-माईओ । पहिली दच्छसुता, के शैलसुता, ब्रह्मचारणी, दूसर मा । तीसर चंद्रघण्टा, हे कूष्माण्डा, चउथा नामे, तो उर मा ।। पंचम स्कन्धमाता, भाग्य विधाता, कात्यानी तो, छठ दाई । कालरात्रि साते, गौरी आठे, नवम सिद्धदात्री, नौ दाई ।। तोरे दरवाजा, भगत समाजा, अपने माथा, फोरत हे । सब औती-जौती, धरे मनौती, अपने हाथे, जोरत हे ।। मन मा विश्वासा, होही आसा, अब तो पूरा, दाई ओ । ये ममता तोरे, जिनगी मोरे, कूंद-कूंद सुघ-राई ओ ।।

दाई नवगढ़हिन हवय, माना तरिया पार । नाव महामाया हवय, महिमा हवय अपार ।। लाल बरन दाई हवय, जिभिया लाल लमाय । लाली चुनरी ओढ़ के, अपन दया बगराय ।। कहन डोकरी दाई हमन, करके मया दुलार । दाई नवगढ़हिन हवय .. दाई मयारू घात हे, पुरखा हमर बताय । सबो भगत के दुख दरद, सुनते जेन मिटाय ।। राज पहर ले हे बसे, किल्ला पुछा कछार । दाई नवगढ़हिन हवय... मंदिर तरिया घाट हा, बनते बनते जाय । फेर बिराजे दाई इहां, आसन एक जमाय ।। ददा बबा ले आज तक, करत हमर उद्धार । दाई नवगढ़हिन हवय....

पितर पाख मा देवता, पुरखा बन आय । कोनो दाई अउ ददा, कोनो बबा कहाय ।। श्रद्धा अउ विश्वास मा, होवय नही सवाल । अपन अपन आस्था हवय, काबर करे बवाल ।। हरियर हरियर पेड़ मा, पानी नई पिलोय । मरे झाड़ मा तैं अभे, हउला भरे रिकोय ।। बारे न दिया रात मा, दिन म करे अंजोर । बइहा पूरा देख के, तउरे ल सिखे घोर ।। अपने पहिली प्यार ला, भूलय ना संसार । तोरे दाई के मया, आवय पहिली प्यार ।। रंग रंग के हे मया, एक रंग झन देख । सात रंग अउ सात सुर, दुनिया रखे समेख ।। नारी के नारी मनन, समझे कहां सुभाव । सास बहु मन गोठ मा, कर डारे हे घाव ।। दाई के ओ बेटवा, बाई के सिंदूर । जेन रंग ला वो धरे, रंगे हाथ जरूर ।। नारी ले परिवार हे, नारी ले घर-द्वार । चाहे ओ हर जोर लय, चाहे रखय उजार ।। सास ससुर दाई ददा, बनके करे दुलार । बहू घला बेटी असन, करय उन्हला प्यार ।। बने रहय विश्वास हा, आस्था रहय सजोर । श्रद्धा के ये श्राद्ध हा, दया करय पुरजोर ।। -रमेश चौहान

मोर छत्तीसगढी के पहिलि परकासित पुस्तक, विमोचन दिनांक 21 फरवरी 2015, छत्तीसगढ राजभाषा आयोग के तीसर प्रान्तीय सम्मेलन, बिलासपुर मा विमोचित ये पता मा जाके पढ सकत हंव https://drive.google.com/file/d/0B_vVk5gISWv3YkhvYjdPTWJHZms/view?usp=sharing / https://drive.google.com/file/d/0B_vVk5gISWv3YkhvYjdPTWJHZms/view?usp=sharing

जय हो मइया शारदे, पांव पखारॅंव तोर । तोरे दर मा आंय हॅंव, बिनती सुन ले मोर । बइठे सादा हंस मा, करे सेत सिंगार । सादा लुगरा तोर हे, सादा गहना झार ।। सादा के ये सादगी, ममता के हे डोर । तोरे दर मा आंय हॅंव. एक हाथ वीणा हवय, दूसर वेद पुराण । वीणा के झंकार हा, डारे जग मा जान ।। वेद ज्ञान परकाश हा, करत हवे अंजोर। तोरे दर मा आंय हॅंव. ज्ञान समुंदर तैं हवस, अविरल अगम अथाह । कोनो ज्ञानी हे कहां, पावय जेने थाह ।। तोर दया ला पाय बर, बिनय करत कर जोर । तोरे दर मा आंय हॅंव.

चरण पखारॅंव तोर प्रभु, श्रद्धा भेट चढाय । तोरे मूरत ला अपन, हिरदय रखॅव मढाय ।। हाथी जइसे मुॅह हवय, सूपा जइसे कान । हउला जइसे पेट हे, लइका के भगवान ।। तोरे अइसन रूप हा, तोर भगत ला भाय । चरण पखारॅंव तोर प्रभु.... सहज सरल तो तैं हवस, सब ला देत अषीश । लइका मन तोला अपन, संगी कर डारीष ।। लाये तोरे मूरती, घर-घर मा पघराय । चरण पखारॅंव तोर प्रभु... जम्मो बाधा मेटथस, पाय भगत गोहार । कारज के षुरूवात मा, करथन तोर पुकार ।। विघ्न हरन तब तो जगत, तोरे नाम धराय । चरण पखारॅंव तोर प्रभु..... ...©-रमेश चौहान

आजा मोरे अंगना, हे गणपति गणराज । गाड़ा गाड़ा नेवता, तोला हे महराज ।। भादो के महिना हवय, अउ अंजोरी पाख । तोर जनम दिन के बखत, दया मया ले ताख ।। तोरे जस हम गात हन, सुन ले प्रभु आवाज । आजा मोरे अंगना... तीन लोक चउदा भुवन, करे ज्ञान परकास । तही बुद्वि दाता हवस, हवे जगत ला आस । विघ्न हरण मंगल करण, कर दे पूरा काज । आजा मोरे अंगना... नान नान लइका हमन, तोर चरण मा जाय । करबो पूजा आरती, मोदक भोग लगाय ।। मूरख अज्ञानी हवन, रख दे हमरे लाज । आजा मोरे अंगना... गली गली हर गांव मा, तोरे हे जयकार । मूषक वाहन साज के, सजा अपन दरबार ।। अपन भगत के मान रख, होवय तोरे नाज । आजा मोरे अंगना...

शान रहिस जे काल के, रहिस हमर पहिचान । नंदावत वो चीज मा, कइसे डारी जान ।। कतको बरजे डोकरा, माने नही जवान । जुन्ना डारा छोड़ के, टूटथे नवा पान ।। गोठ नवा जुन्ना चलय, जइसे के दिन रात । अपन अपन हा पोठ हे, जेखर सुन ले बात ।। दुनिया के बदलाव ला, आँखी खोल निटोर । ओही चंदा अउ सुरूज, ओही धरती तोर ।। अपन रीति रिवाज धरे, पुरखा आय हमार । अब तो बांटा तोर हे, ऐला तैं सम्हार ।।

नोनी के दाई अभी, गे हे मइके गाॅंव । मोरे बारा हाल हे, कोने हाल बताॅंव ।। तीजा पोरा नेंग हा, अलहन लागे झार । चूल्हा चउका के बुता, देथे मोला मार ।। भड़वा बरतन मांज के, अपन आंसू बोहाॅव । नोनी के दाई अभी... कभू भात गिल्ला बनय, कभू जरय गा माढ़ । साग बनय ना तो कभू, झोरे लगय असाढ़ ।। अपने मन ला मार के, अदर-कचर मैं खाॅंव । नोनी के दाई अभी... बड़ सुन्ना घर-बार हे, चाबे भिथिया आज । अपने घर आने लागे, कहत आत हे लाज ।। सांय-सांय अंतस करय, मन ला कहां लगांव । नोनी के दाई अभी... कहूं होतीस मोर गा, कोनो बहिनी एक । तीजा हा मोला तभे, लागतीस गा नेक ।। बिन बहिनी के ये दरद, काला आज बताॅंव । नोनी के दाई अभी...

डहत हवे गा बेंदरा, कूद कूद अतलंग । खपरा परवा छानही, दिखत हवय बदरंग ।। तरई आंजन छानही, खपरा गे सब फूट । लड़त हवे गा हूड़का, एक दूसर म टूट ।। मोठ डाठ हे ओ दिखत, कतका दिखत मतंग । डहत हवे गा बेंदरा... बारी बखरी मैदान हे, खेले जिहां घुलंड । दरबर दरबर आय के, बने हवें बरबंड ।। देखव ईंखर काम हा, लगत हवे बड़बंग । डहत हवे गा बेंदरा... (बरबंड-पहलवान, बडबंग-बेढंगा) थक गे सब रखवार हा, इहां बेंदरा भगात । चारे दिन के चांदनी, फेर कुलूपे रात ।। सोचय कुछु सरकार हा, कइसे बदलय ढंग । डहत हवे गा बेंदरा... जंगल झाड़ी काट के, मनखे करे कमाल । रहय कहां अब बेंदरा, अइसन हे जब हाल ।। छाती मा ओ कूद के, लड़त हवे ना जंग । डहत हवे गा बेंदरा...

तीजा पोरा आत हे, आही नोनी मोर । घर अंगना हा नाचही, नाचही गली खोर ।। लइकापन मा खेल के, सगली भतली खेल । पुतरा पुतरी जोर के, करे रहिस ओ मेल ।। ओखर दीया चूकिया, राखे हंव मैं जोर । तीजा पोरा आत हे.... जुन्ना जुन्ना फ्राक अउ, ओखर पेन किताब । धरे संदूक हेर के, बइठे करंव हिसाब ।। आगू पाछू ओ करय, धर धोती के छोर । तीजा पोरा आत हे.... नार करेला बाढ़ के, होथे जस छतनार । कोरा के बेटी घलो, चल देथे ससुरार ।। होय करेजा हा सगा, कहे करेजा मोर । तीजा पोरा आत हे.... दुनिया के ये रीत मा, बंधे हे संसार । नाचत गावत तो रहंय, लइका सबो हमार ।। परब परब मा आय के, तृष्णा ला दैं टोर । तीजा पोरा आत हे....

बादर बैरी तैं कहां, मुॅह ला अपन लुकाय । कइसे तैं आसों भला, भादों मा तड़पाय ।। काबर तैं गुसिआय हस, आज कनेखी देख । उमड़-घुमड़ तैं आय के, रूके नही पल एक ।। भादों के ये भोमरा, बने जेठ भरमाय ।। बादर बैरी तैं कहां..... धनहा के छाती फटे, मुड़ धर रोय किसान । नरवा मन पटपर हवय,  अटके अधर म जान ।। पानी के हर बूंद हा, तोरे कोख समाय ।। बादर बैरी तैं कहां..... काबर बिट्टोवत हवस, पर तो जही दुकाल । काबर हमरे संग मा, खेले छू-छूवाल ।। तोर रिसाये ले जगत, हमला कोन बचाय । बादर बैरी तैं कहां..... सुन ले अब गोहार ला, गुस्सा अपनेे छोड़ । माफी मांगत हन हमन, अपन हाथ ला जोड़ ।। रद्-रद् पानी अब बरस, जड़-जीवन हरसाय । बादर बैरी तैं कहां.....

रद्दा जोहत हन हमन, आजा माखन चोर । तोर बिना बिलवा कहूं,  लगे न मन हा मोर ।। तोरे मूरत देख के, आंखी म आसुु आय। मोर-मुकुट मुड़ मा हवय, मुॅह बसरी हा भाय ।। सुन सुन लीला तोर तो, नाचे मनुवा मोर । रद्दा जोहत हन हमन... अपन भगत बर तैं करे, बाल-चरित ब्रजधाम । लइका सियान तोर तो, धरे मोहना नाम ।। तोरे सुरता रात दिन, करे करेजा षोर । रद्दा जोहत हन हमन... भेट करे के आस मा, मोर चलत हे सास । आज नही ता काल तैं, रखबे मोरे आस ।। तोर हाथ मा तो हवय, मोरे जीवन डोर ।। रद्दा जोहत हन हमन...

होय एक शिक्षक इहां, हमर राष्‍ट्रपति देश्‍ा । अब्बड़ ज्ञानी ओ रहिस, सादा ओखर वेष्‍ा ।। राधा कृष्‍णन नाम के, सर्वपली पहिचान । ज्ञानी दर्शन श्‍ाास्त्र के, जानय मनोविज्ञान ।। शिक्षण विषय मा डूब के, देवय ओ हा ज्ञान । ऐही गुण ले पाय हे, कई कई सम्मान । आज ओखर जनम दिन, कोटि कोटि परनाम । शिक्षक मन ले प्रार्थना, करव बने गा का म ।।

जय हो दाई खमरछठ, महिमा तोर अपार । लइका मन बर दे असिस, करत हवन गोहार ।। तोरे सगरी पार मा, बइठे हाथे जोर । लइका के दाई सबो, पाव पखारत तोर ।। रखबे दाई लाज ला, बन के तैं रखवार ।। जय हो दाई खमरछठ .... तोर दया ले देवकी, पाय रहिस बलराम । उतरा पाये बेटवा, परीक्षीत हे नाम।।।। तोरे दर मा आय हन, हमरो कोख सवार ।। जय हो दाई खमरछठ....... नागर रेंगे ना जिहां, ऊंहे के ले धान । भाजी पाला खाय के, राखे हन हम मान ।। महुवा लाई अउ चना, जोरे हवन निमार ।। जय हो दाई खमरछठ ... दूध दही ल भईस के, भर के महुवा पान । फुड़हर फूले हाथ ले, करत हवन यशगान ।। भर दे हमरे पोतनी, दया मया तैं झार ।। जय हो दाई खमरछठ.... तोर दया के पोतनी, मारॅंव लइका पीठ । धन दौलत अउ यश मिलय, होय उमर के ढीठ ।। गोरस के ओ लाज ला, राखय बने समार । जय हो दाई खमरछठ.......